ORANJESTAD(AAN): Atraves di e añanan na Aruba tabata tin diferente manera pa celebra Pasco y recientemente un cliente di DIARIO a
trece un programa di fiesta di Pasco di Lago pa e corant, pa duna un ehempel di con esaki tabata 72 aña pasa.
Den e programa por wak kico tur tabata tin den e celebracion di Pasco cu a tuma lugar riba 18 di December di 1953, na Aruba Golf Club.
E maestro di ceremonia e tempo ey tabata Dr. A.N.J Reinders-Folmer, mientras cu J.J Horigan y Dr. L.C Kwartsz a duna palabranan di bon bini na tur hende presente.
Despues cu a canta himno di Hulanda, di Merca y di Reino Britanico, Trio Sabaneta cu tabata consisti di Betrano Ras, Concepcion Ras y Supriano van der Linden, a duna nan presentacion.
E manager di e banda tabata Geronimo Winterdaal, mientras cu Jose van der Linden tabata e compositor di e cancionnan na Papiamento.
Durante e fiesta na cuater occasion a saca door prize, unda cu cada biaha a duna 3 persona un basket.
Padu Lampe tambe a toca piano na e fiesta aki, un biaha su so y un biaha acompaña pa un grupo di cantante.
Tali Lopez-The Caribbean “Carlos Gardel” tabata a presenta acompaña pa Shemmy Coronel, Eddie Croes, Harold Hopmans y Jan Croes.
Na e fiesta LAGO Community Band tambe a toca, mientras cu nan a acompaña esnan cu a canta e himnonan.
