Auto a dal muhe burachi canando mey-mey di caminda na Solito

ORANJESTAD (AAN): E prome yamadanan a drenta Dialuna alrededor di 8:30 pm, indicando cu auto a caba di dal un persona riba e caminda di Playa pa Tanki Leendert, na altura di Solito.

   Mesora un patruya di Polis a cuminza mobiliza pa eynan, y Centro di Alarma na su turno a manda Ambulance pa e area.

   E prome unidad di Polis cu a yega, a bin topa cu e accident net pabao di caminda dilanti Lito Convenience Store na Solito.  Un auto sedan a dal un persona femenino.  Polis a bin haya e muhe herida abao riba caminda.  Aparentemente agentenan no por a comunica cu ne, debi cu segun Polis, e lo por ta bao influencia.

   Ambulance a yega, pero como cu e muhe tabata fuertemente bao influencia, no por a comunica cu ne, y esaki a dificulta e trabao di Paramediconan pa saca afo con serio e incidente ta.

   Chauffeur di e Hyundai Sonata a relata na Polis, cu e tabata moviendo zuid for di Tanki Leendert rumbo pa Playa, y diripiente na forma inespera e muhe a cana subi caminda.  E muhe canando basta mey-mey, pesey el a dal na e banda robez, na e spiel pafo, y un parti dilanti parti robez di e auto,.

   Polis di trafico a presenta pa cuminsa cu nan investigacion.   E muhe a wordo hiba Hospital, pa haci test pa asina determina e golpinan ricibi.