Micky’s Foundation a divulga cu ya nan no por sigui haci e trabao

Grupo di 140 mucha cu limitacion ta wordo afecta

• Yamada urgente na Gobierno y Hospital y AZV pa nan sigui cu esey 

ORANJESTAD (AAN): E organizacion local “Micky’s Foundation”, ta uno cu desde su comienzo tabata encarga cu terapia specializa pa muchanan cu tin limitacion fisico, y of limitacion cognitivo riba e isla di Aruba.

   Sinembargo siman pasa, e fundacion a haci un anuncio cu a sorprende hopi hende, pero cu nan splicacion nan ta mustra cu nan no por haci e trabao mas, siendo cu en general loke nan ta haciendo ta supose di ta bao hala di tanto AZV di Aruba como tambe Gobierno di Aruba.  Aki DIARIO ta trece nan mensahe cu a wordo reparti tur caminda.

   Nan mensahe: Entrante 1 di Januari 2026, Micky’s Foundation lo stop di duna servicio di fisioterapia pediatrico.  E decision aki, aunke ta dificil, ta necesario y mester a wordo tuma di hopi tempo pasa caba.  E momento a yega pa Gobierno di Aruba, tambe Dr. Horacio Oduber Hospital, y AZV asumi finalmente tur responsabilidad di salbaguardia e necesidadnan terapeutico di e grupo di muchanan mas vulnerabel di e isla.  Siman pasa e mensahe aki a wordo duna na como 100 mayor di muchanan cu tin trastorno neurologico grave.  E anuncio aki a wordo ricibi cu profundo preocupacion.

   Algun mayor ya caba a expresa sentimento di derota, y nan a cuminza hasta pensa pa bay muda pa Hulanda.  Otronan a reacciona cu determinacion y cuminda haci un yamada pa tur hende drenta den accion.  E reaccionnan ta trece dilanti tanto e gravedad di e situacion y e necesidad urgente pa solucionnan structural.

   Micky’s Foundation lo sigui hunga un rol strategico. Nan lo sigui di ta resiliente y determina pa sigui defende firmemente e derecho y interesnan di e muchanan aki y nan famia, di cual nan necesidad a wordo neglisha demasiado largo door di instancianan oficial.  Corda cu nunca tabata e responsabilidad di Micky’s Foundation (un iniciativa crea pa y door di mayornan) pa suministra rehabilitacion pedriatico di forma structural.  E responsabilidad ey ta supose di cay den scochi di Gobierno y AZV.  No obstante, durante ultimo 11 añanan, e Fundacion a logra cubri e bashi ey, logrando na yuda 140 mucha y suministrando aproximadamente 14.000 ora di terapia, duna door di 40 fisioterapeutnan pedriatrico.  Tur e proyectonan a wordo organiza door di boluntarionan, y tur terapia tabata gratis y tur iniciativa a wordo financia door di patrocinadornan.

   Un carta formal a wordo manda pa Ministro di Salubridad Publico Mervin Wyatt-Ras, tambe Prome Ministro Mike Eman, Director di AZV, ing. Edwin Jacobs, y President Jaco Vroegop di Dr. Horacio Oduber Hospital.  Den e carta aki, a pidi un accion inmediato.  Aunke e procesonan politico por ta hopi lento, nan ta kere cu hunto cu sosten di mayor-, famia-, patrocinador-, y tur individuo cu por reconoce e urgencia moral di e asunto aki, lo por logra yega na un cambio significante.  Hunto nan ta fuerte!

   Micky’s Foundation na final ta confirma cu durante 2026 nan lo sigui duna terapeutanan cualifica riba tereno di terapia ocupacional y terapia di speech.  Fisioterapia pedriatico, aunke e ta e disciplina mas esencial, ya lo no wordo ofreci, manera a wordo anuncia den e boletin aki.