Aumento di pensioen ta bira realidad den tur hogar

Minister President Mike Eman

ORANJESTAD (AAN): Un aña pasa, den tur skina di Aruba, den hogarnan rond Aruba, den articulonan y mocionnan, den programa di partido y Gobernacion AVP-FUTURO e compromiso a wordo haci. Na tur momento Minister President Mike Eman y promer como lider di oposicion semper a keda enfatisa cu nos grandinan nan placa no ta yega, cu mester haci algo substancial cu pensioen pa nos grandinan. Palabranan grandi y profundo cu awe ta bira realidad den tur hogar na Aruba.

Riba su pagina social Minister President Mike Eman a comparti: “Un abrazo na tur nos grandinan cu hopi amor. Cerca distinguida mamanan Sofia Ana Kelly Arends y Christina Kelly Arends den veranda un aña pasa nos a haci e compromiso cu lo aumenta pensioen pa nos grandinan. Promesa haci, promesa cumpli. Promer nos a percura pa un aumento di 250 florin y awor ta sigui un otro 250 florin. Nos adultonan mayor a carga Aruba riba nan schoudernan pa hopi aña. Nan a traha duro, a cria famia, a conserva nos valornan, warda nos cultura y a entrega nos un Aruba cu nos ta orguyoso, un Aruba y un Pueblo cu nos ta stima.

Cu e aumento den AOV y reparatietoeslag den menos di un aña cu 500 florin pa pensionado soltero y 900 florin pa pareha nos a cumpli cu loke nos a priminti: mas siguridad, mas dignidad, mas paz y trankilidad pa nos grandinan. Ban sigui cu amor cuida nos grandinan.”.

Cu e implementacion di e aumento den AOV combina cu e reparatietoeslag, e total di pensioen pa pensionadonan ta subi di manera significativo entre januari 2025 y januari 2026. Esaki ta cumplimento di palabra, basa riba un vision di largo plaso pa un Aruba mas humano y mas husto. Eman ta gradici henter Gabinete AVP-Futuro. 

E aumento ta nifica concretamente:

pensioen pa soltero ta subi cu AWG 500 pa luna

pensioen pa pareha ta subi cu AWG 900 pa luna

pensioen pa pareha parti ta subi cu AWG 485 pa luna

Eman ta bisa cu un pais cu no honra su grandinan, ta perde su memoria y su direccion, E aumento di pensioen ta parti di un enfoque mas amplio pa: prosperidad comparti, siguridad social, coherencia den maneho social y un desaroyo cu ta pone curason den maneho di un Pais.