Por fin prome paso pa drecha edificio antes DOW na Paardenbaaistraat a cuminsa

ORANJESTAD (AAN) Un grupo di trahado di un compania priva contrata pa Gobierno di Aruba, ta bezig ta dunando e prome paso pa drecha e edificio, antes DOW, na Paardenbaaistraat, cu un limpieza total.

   DIARIO a puntra un di e trahadornan cuanto tempo lo bay tuma, ya cu e edificio a keda abandona pa tempo largo, pero e no por bisa exactamente pasobra ta hopi trabao tin, maske con lihe nan ta purba di bay. Pero e cambio ta notable for di awo caba.

   Nan no tin detaye kico exactamente e edificio ta bay bira despues di wordo drecha, pero e trabaonan di sea reconstruccion, renovacion, of restauracion lo mester keda cla mas pronto posibel, pasobra e intencion ta pa cuminza cu e drechamento na Januari proximo, segun e informacion cu e trahado aki tin.

  Por corda cu Gobierno anterior a elabora un plan hunto cu Oficina di Turismo, y Aruba Port Authority cu, aparentemente, lo a financia gran parti di e proyecto.

   En todo caso, pa un of otro motibo, tempo a sigui bay, kehonan di e mal bista y mal holo, a bin acerca tanto di nos hende local como di e turistanan y algun comerciante rond di e edificio. Un edificio cu, si su murayanan lo a papia, lo por a conta hopi historia di e desaroyo di infrastructura di nos pais, locual a logra pa decadanan y loke a keda sin logra prome cu nan a muda pa nan bunita edificio nobo na Sabana Blanco, unda nan a sigui cu e metanan di desaroya proyectonan di infrastructura. Lo ta ideal si gobierno actual, cu ta dunando e atencion mereci y desea pa DOW bieu (manera diferente hende ta yam’e) lo duna continuacion na e proyecto cu a keda pendiente, pasobra e ta uno hopi interesante.

   E trahadornan cu ta laborando aworaki tey pa deshaci di tur ruina, sushedad, y dañonan causa pa e neishi di paloma, ta papia di un proyecto grandi cu lo bin aden. En todo caso, tur cos positivo cu por sosode, ta mas cu bon bini pa Aruba.