E mentalidad di e Arubiano central den acusacion contra Benny

The content originally appeared on: Diario

Cu firmesa historico Ministerio Publico a acusa Benny Sevinger

*E falta di confiansa di poblacion den un democracia bibo y real

* E avestrus ta mira loke ta pasa mientras e ta come for di suelo 

ORANJESTAD(AAN)—E tarea di Ministerio Publico ta, pa persigui loke ta malo y evita cu daño ta wordo haci na un pais y ciudadanonan.

Por considera Ministerio Publico como e aparato di defensa interno di un pais y su ciudadanonan, riba tur tereno pa asina husticia como e factor basico pa libertad y bienestar, por wordo garantisa na un comunidad.

Pa Ministerio Publico por defende e interes di un pais y su ciudadanonan, e mester comprende e forma di pensa y e mentalidad cu ta reina y cu ta decisivo pa principionan y moral di un pais.

Ta e principionan y moral di Aruba, DIARIO a busca den e relato final di Ministerio Publico den sala di Corte di Husticia, caminda e acusacionnan di Husticia contra Benny Sevinger mester a haya contenido pa democracia triunfa den veredicto di Huez.

Un Arubiano lo por a defende e bienestar di Aruba y di e Arubianonan manera tur exponente di Ministerio Publico a haci den e caso aki?

Ta na Huez pa dicidi e final di e caso di Ministerio Publico, pues Pueblo di Aruba, contra Benny Sevinger.

Sinembargo, como medio di comunicacion, si por analisa e puntonan principal cu a conduci na un peticion pa castigo di parti di Ministerio Publico contra Benny Sevinger pa haci Husticia cu Aruba.

Pa interes di Aruba y e Arubiano wordo sirbi, e Fiscal mester ta interprete di sentimentonan y moral di e Pueblo di Aruba, cu mester ta base di e sentencia final di Huez.

No ta opinion personal di magistrado riba stul of riba pia den e sala di Corte ta conta pero ley den cual e bienestar di Aruba y Arubianonan ta hancra.

E periodista, den e caso aki DIARIO, tin e deber sagrado di investiga, si e persecucion penal cu ta conduci na e veredicto di Huez, ta cuadra cu e definicion di bon y malo na Aruba.

Ora revisa e loke a bini dilanti den sala di Corte di Husticia di parti di Ministerio Publico, ta topa cu e Arubiano en busca di un pida tereno, un pida suelo di su pais, pa e construi su cas.

E orguyo y sentido di dignidad di e Arubiano en busca di su tereno, ta bini dilanti den e presentacion di Ministerio Publico, cu ta splica pakico e ta persigui Benny Sevinger.

Den e palabranan di Ministerio Publico de sala di Corte di Husticia, ta mira Benny Sevinger como un avestrus cu kier haci kere cu e no a mira nada malo tuma lugar, pero (manera Ministerio Publico kier proba), tabata mira tur loke tabata pasa.

Na un forma historico corupcion a wordo presenta dor di Ministerio Publico den e caso contra Benny Sevinger.

Kico corupcion ta nifica pa Pueblo di Aruba, no ta wordo midi cu e midi personal di e exponentenan di Ministerio Publico, pero cu e pensamento Arubano cu a bini dilanti den entre otro e investigacionnan cu ta wordo haci pa establece si Aruba ta kere cu tin corupcion na Aruba.

Caso Avestruz ta wordo presenta como un ehempel pakico mayoria grandi na Aruba, mescos cu ta e caso na otro paisnan, no tin confiansa cu nan pais no conoce corupcion.

Corupcion cu ta kita for di e derecho di e Arubiano pa haya su tereno y entrega e derecho di e Arubiano na un grupito cu ta paga pa hasta haya chens pa haci negoshi cu suelo di Aruba.

DIARIO lo sigui amplia riba e caso historico y loke e ta nifica na regreso na e mentalidad sano y e sentido di dignidad y husticia di e Pueblo Arubano.

Mientrastanto ya e imagen di un avestruz cu no ta mira y no sa kico ta pasa rond di su persona, manera Benny Sevinger kier a pinta pa Aruba mira, a wordo destrui den e exposicion di Ministerio Publico den Corte di Husticia.

Mientras e avestruz ta come, segun e acusacionnan e tabata mira robo di derechonan di e Pueblo di Aruba y e mentalidad di e Arubiano mara na e dignidad di un hogar propio!