Apesar di pasa via 4 Sindicato e trahadornan di Arubus ta sigui sin renobacion di CAO

Ademas di decepcion tin cuater chauffeur AO pa motibo di problema di lomba:

ORANJESTAD (AAN) Informacion cu a yega na DIARIO, ta indica cu e trahadornan di Arubus ta hopi decepciona, pasobra nan tin añanan wardando pa nan posicion laboral, entre otro, wordo regla pero nan a pasa den cuater sindicato caba y ningun a logra pa nan bay un tiki dilanti.

   Nan no a hay sikiera un reunion cu e minister nobo di Transporte, pa expone nan situacion y nan mescos cu tur otro trahado di gobierno a entrega di nan salario den temponan dificil, manera durante Covid-19.Costo di bida ta demasiado halto, nan ta  paga belasting cu tambe ta tuma bon parti di nan entrada, y manera tur ciudadano cu ta traha nan ta cumpli.

   Trabao di e chauffeurnan di Arubus no ta facil. Varios di nan ta sufri di lomba despues di añanan di eherce nan funcion, y tin diferente factor di nan trabao di manehado di bus, cu ta afecta nan fisicamente.

Aworaki, segun indicacion di fuente fidedigno, tin cuater chofer cu problema di lomba cu mester keda AO, pasobra nan condicion di lomba t’asina deteriora cu nan a bira  practicamente incapacita pa sigui haci e trabao aki.

   Pa colmo, nan ta stuur busnan den mal condicion y tin un problema serio entre dos departamento crucial, pa loke ta mantenimento di e flota.

   DIARIO mes a purba busca informacion pero pa nos sorpresa nos a wordo bisa cu nan no tin director, mester a nombra uno pasobra esey cu tabata tin te aña pasa a retira cu un bon areglo y no a nombra ningun director mas. No a logra contacto tampoco cu un PR.