Corte Superior a duna ordo pa Omar Oduber wordo deteni bek y hiba KIA

The content originally appeared on: Diario

A elimina decision di Huez Comisario a lag’e den libertad

ORANJESTAD (AAN): Riba Diabierna, Corte Superior via Video Conference a atende un apelacion di Ministerio Publico di Aruba contra e decision di Huez Comisario, cu a dicidi pa duna e sospechoso Otmar Oduber di Caso Flamingo, bek den libertad.

   Manera ta conoci, tabata luna pasa riba Diamars 10 di Mei 2022, cu LandsRecherche a detene e ex-Ministro, y ex-lider di Partido POR, Otmar Oduber den cuadro di investigacion di Caso Flamingo.

   Sinembargo aunke nan dossier di investigacion ta mustra cu tin ainda varios aspecto pa sigui cu e interogacion, Huez Comisario sorprendentemente riba Diabierna 20 di Mei 2022 a duna OK pa laga Oduber den libertad.   Ministerio Publico a opina cu esaki ta stroba nan investigacion.

   Pesey Corte Superior a trata e siman aki e apelacion di Ministerio Publico contra decision di huez-comisario tocante detencion di e sospechoso. Ministerio Publico a apela e decision aki dia 24 di Mei 2022, esta cu Huez Comisario pa nenga detencion di e sospechoso en cuestion.

   A trata e apelacion: DIARIO por a compronde di abogado mr. Carlo cu dia 7 di Juni 2022, e tratamento di e apelacion a tuma lugar via video conference. Tres Huez di Curacao (Hof) na Corte di Husticia na Curacao a atende e caso mientras cu den un sala di Corte di Husticia na Aruba, tabata presente Procurador General, Otmar Oduber y su abogado mr. Vito Carlo.

   Tratamento di e caso aki tabata cu portanan sera o sea cu prensa no por tabata presente. A palabra cu Hof lo studia e caso y lo dicta sentencia e siman aki mes.

   Door cu ta trata aki di un caso penal contra un ex minister, ta hiba un protocol cu ningun Hues di Aruba lo trata e caso. Esey a sosode tambe den e caso di ex-Ministro Paul Croes y actualmente ta sosodiendo den e caso Avestruz y Flamingo.

   Informacion cu DIARIO ta dispone di dje ta mustra cu Diamars dia 7 Juni 2022, Procurador General a presenta cu mas motibonan di peso pa hustifica e prolongacion di detencion di Otmar Oduber. Esaki a haci cu Diabierna mainta, Hof den su sentencia, ta haya cu awor, compara cu e situacion anterior, Ministerio Publico a presenta cu motibonan di peso cu ta hustifica pa prolongacion di detencion di Otmar Oduber.

   “Preocupacionnan suficientemente serio”: Awor riba Diabierna 10 di Juni 2022, Corte Superior a duna ordo pa detencion di Oduber bek den e investigacion Flamingo pa un termino di ocho dia.

   Den un boletin emiti pa Ministerio Publico, nan a mustra cu Corte Superior a determina cu tin preocupacionnan suficientemente serio di fraude den e tema di entrega di tereno, como tambe nombramento di ambtenaarnan spirito. E sospechoso lo worde traslada pa Prison di KIA.

   Esaki a pone cu Diabierna Otmar Oduber a entrega su mes pa asina sigui cu e proceso di investigacion den e caso di malversacion como minister.