Tur compania estatal mester sigui cumpli cu condicion di Hulanda di recorte di 12.6 %

Prome Minister Evelyn Wever-Croes:  ---   *Si bira necesario, nos ta obliga di ancra e condicion aki den ley

ORANJESTAD (AAN): Den conferencia di prensa di Gobierno di Aruba dialuna mainta, Prome Minister Evelyn Wever-Croes a duna un splicacion amplio di con y pa kico a yega na e recorte di 12.6 % den salario di empleadonan publico y semi publico. Esaki, Prome Minister a enfatisa, ta un condicion cu Hulanda a duna pa asina Aruba haya e sosten di likidacion. Tambe Hulanda a pone como condicion cu e recorte mester ta “tot nadere orde”, pues te un otro aviso.

            Gobierno, despues cu Covid a dal y hunto cu ne portanan a dal cera, mester a actua lihe pa asina Aruba por sobrevivi. Gobierno a pidi pa corta cu 12.6% den sector publico y semi-publico y a pidi sector priva tambe cooperacion y pa loke wordo corta bay den un fondo pa FASE pa asina por yuda tur esnan cu tin mester.

            Recorte di 12.6% ta conta pa tur compania estatal y tur compania estatal a presenta un declaracion di accountant cu nan a corta salario di 12.6%. Gobierno su punto di salida ta cu TUR entidad estatal mester cumpli cu e recorte. Gobierno ta sigui monitorea y si un entidad no cumpli, lo tuma medida necesario.

            Locual lo cambia una bes cu no tin FASE mas, ta cu no mester deposita e recorte den e fondo mas, pero e placa por keda den e compania y yuda den cash flow di e compania.

            Prome Minister a enfatisa cu si entidadnan estatal no cumpli cu e condicion aki, lo introduci un ley pa ancra e condicion aki den ley, mescos cu Corsou y Sint Maarten a haci.

            “Mi ta spera cu nos no mester bay asina leu y cu aki na Aruba tur esnan di sector publico y semi publico realisa e seriedad di e situacion y cu ainda nos mester sigui cumpli cu e condicion aki di Hulanda pa por haya sosten di likides. Aruba, y especialmente esnan mas vulnerable, ta depende di e sosten di likides di Hulanda y nos lo no permiti algun entidad estatal pone esaki na riesgo”, Prome Minister a acentua.

            Ta importante pa tur entidad estatal sigui realisa y comprende, cu sin e sosten di likides no por paga salarionan. Lo no tin placa pa cuido di salud, siguridad di nos cuerpo policial ni enseñansa. Aruba ta sigui depende di e sosten di likides por lo tanto mester sigui cumpli cu e recorte di 12.6 %.