Wardacosta ta yuda barco di bela

ORANJESTAD (AAN): Diadomingo den oranan di madruga, Wardacosta a ricibi un notificacion di e boto White Cloud cu tabata tin problema riba lama.

E capitan a notifica cu su boto tabata tin problema cu motor y cu e no por a sigui nabega. E punto di sosten di Wardacosta na Aruba mesora a dirigi un patruya pa bay na localidad di e boto den cercania di Aruba.

Na momento cu e boto di patruya a yega na e localidad di e boto, e boto patruyero di Wardacosta a tou e boto cu dos persona abordo. Wardacosta a hiba e boto na Barcadera, caminda White Cloud por a mara safe.

Wardacosta ta avisa doñonan di boto pa haci mantencion regular na nan botonan. Pa nan propio seguridad na bordo mester tin: suficiente chaleco di salbabida, un flashlight cu bateria y un pitu, un EHBO kit, suficiente awa, aparato pa paga candela, VHF radio of un cellular full di charge. Evita e chens di un accidente of situacion peligroso riba lama cu boto of seadoo.

Wardacosta ta enfatisa cu den caso cu mester di yudansa por yama nan riba 913 of e WhatsApp number 005999 510 0913. Gosa di lama y beachnan na un manera safe.