Rescate milagroso 20 aña pasa

            Dialuna 26 di juli 2021 ta net 20 aña pasa cu e pilotonan Ruben Croes y Greg Croes a rescata bida di 2 tripulante venezolano ora nan avioneta, un Beachcraft BE-36 bou bandera Venezolano, a cay den awanan di Aruba pa 7:40 AM. 

            E mainta ey, 26 di juli 2001, ora cu capitan Greg Croes tabata bulando un avion di Avia Air rumbo pa Aruba, el a scucha e May Day drenta. El a skirbi e coordinatnan y asina cu el a yega Aruba, Greg a informa Ruben Croes di Search & Rescue loke el a tende.

            Ruben cu tabata preparando su avioneta RAT Air pa hiba un grupo di hende Boneiro, a bay cu Greg di biaha den su avioneta priva en busca di e dos naufragonan. Como Greg tabata sa e puntonan exacto, no a dura mucho cu nan a mira e dos personan. Despues cu Rat Air a dal dos buelta riba nan, nan a cuminsa prepara pa pone e GPS y e coordinatnan unda mas o menos nan a cay pa traha nan patronchi di rescate.

            Rat Air por a yega hopi cerca y nan a pinpoint nan den e GPS. E avioneta a cay na 87 miya nautico di Aruba. Capitan Ruben Croes a informa Marina na Corsou y duna nan e coordinatnan pa manda nan crew di rescate.

            Rat Air a sigui bula pa 4 ora largo riba e dos hombernan cu tabata drif den awa, di cual uno tabata parce mal herida. Pa 12or e helicopter Pluto 1 a yega pa despues pa 1or e Lynx di e Barco di Guera Hulandes H.M.S. van Amstel di Marina Hulandes a yega saca nan fey lama. E naufragonan tabata Capitan Jose Ignacio Luzardo (29 aña) y Franco Bellarosa (60 aña), kendenan a lanta buelo 6or di mainta for di Maracaibo cu destino pa Las Providenciales, Turks and Caicos.

            Pa 7:35 ora e avioneta tabata cayendo, Luzardo a grita un May Day despues cu e oilpomp di e motor a cuminsa faya. Nan avioneta a cay den e lama bruto cu olanan di 3 pa 4 meter halto den awanan di Aruba. Cu salbabida bisti, e dos personanan aki a keda 5 ora ta drif den un lama pesta di tribon.

            Den un relato cu Sr. Belarosa a duna, e ta bisa cu di accidentenan asina 3% so ta keda rescata. Nan a pasa algun ora bastante spantoso wardando sin mira ni barco, ni avion yega cerca. Pero no tabata nan dia di muri y nan suerte tabata grandi ora cu Capitan Ruben Croes a dicidi pa cancela tur cos pa e mainta ey y di uza su propio avioneta pa haci e rescate.

            Mas ora pasa den casonan asina, menos e chens riba sobreviviente ta. Rat Air cu den trabounan di rescate ta opera bou e nomber Pluto-3 e ora tabata wordo considera un parti di Marina Real cu tabata haya tur e credito. Pero ta e dos pilotonan aki tabata e promenan pa spot e dos hombernan den awa.

            Cu ambulance a hiba e victimanan pa Dr. Horacio Oduber Hospital pa tratamento. Hopi despues Sr. Luzardo “Nacho”, a manda puntra via Avia Air ken tabata e Rat Air cu tabata bula riba nan. Asina nan a haya sa cu nan angelnan wardador tabata Greg Croes y Ruben Croes. Nunca nan no tabatin palabra bastante pa gradici e dos personanan aki.

            Nan a entrega Greg cu Ruben plakkaatnan di graditud y pa Ruben nan a yega di trece un hamaca bunita cu su nomber borda grandi den dje. Sr. Belarosa a conta cu el a priminti su nietonan cu un dia lo e conta nan un aventura grandi. Pero hamas e por a pensa cu e mes tabata e protagonista den su storia. Sr. Balerosa a fayece algun aña pasa, pero Greg ni Ruben nunca no a lubida e dos cabayeronan aki.

            Luzardo y Belarosa a keda hopi agradecido tambe na henter e team di rescate riba e dia ey y e tremendo bon trato cu nan a ricibi na Aruba. Sosega na paz Franco Belarosa y Nacho Luzardo, aquí en Aruba tienes una familia que te quiere mucho.

Yolanda Croes