Formador Evelyn Wever-Croes a haya un bon bista di e situacion actual den Salud Publico

ORANJESTAD (AAN) – Formador Evelyn Wever-Croes, dentro di su encuentronan cu e stakeholders den area di Salud Publico, a reuni tambe cu Asociacion di Specialista di Aruba y esey tabata un bon reunion.

“Nos a weita di nan punto di bista con nan ta mira e situacion, principalmente nan preocupacion pasobra nan tin coleganan su ta bay laga Aruba, pa bay traha por ehemplo na Bonaire, unda cu nan ta gana mas cu na Aruba, y esey ta algo cu nos a toca e tema cu Hulanda caba, pero aworaki nos tin mas informacion pa nos por bringa e tema aki cu Hulanda”, el a splica.

Despues Formador a reuni cu Asociacion di Docternan di Cas 'HAVA' riba e retonan similar na e specialistanan, cu nan tambe tin, cu ta e mesun tipo di reto unda cu door di problemanan financiero y falta di personal.

El a menciona cu tambe el a reuni cu Respaldo, pasobra e problemanan mental na Aruba, ta hopi importante y crucial y nan ta considera esaki den e Crisis Plan nobo cu Gobierno tin cu bay traha riba dje. Y pa cera e ciclo di reunionnan aki Formador a reuni cu sindicato AVB pa elabora riba e tema di cuido, con nan ta para cu esaki, y con nan ta mira e desaroyonan. Asina Formador Wever-Croes a indica.

El a agrega cu esakinan tabata reunionnan hopi intensivo den cualnan el a haya un bon bista riba e temanan di salud, seguro social, salud mental, no solamente relaciona cu e efecto di Covid-19 sino cu e cortamento di 5 miyon florin.

“Nos a splica cu no ta algo cu gobierno a bin cune pero algo cu a wordo poni como condicion pa nos por a haya sosten di likidez. Pero cu pa e aña aki nos no ta bay corta 5 miyon pa luna; nos a bahe na 2.2% y pa fin di aña nos ta mira cu nos ta yega 60 pero nos ta den dialogo cu Hulanda si, y ohala cu nos por yega na algo, pa asina nos por elimina e peso aki, for di e sector importante aki. Na fin di dia nos por a wak cu cada un di esnan cu nos a papia cu nan, tin un pasion enorme pa nan trabao y e ta yena mi cu satisfaccion y orguyo, di por goberna un pais cu hendenan cu tin asina tanto amor pa nan trabao, den e sector aki, y nos compromiso ta percura pa nan tin e tools y e posibilidadnan pa nan por haci nan trabao miho”, Prome Minister demisionario y Formador, a duna di conoce.

E dignatario a agrega cu ainda no ta cla cu e gremionan di salud, cu falta mas pa reuni cu nan, cu e siman aki ta haya invitacion. E siman aki tambe Formador ta bay riba e temanan di economia, turismo, naturaleza cu e kier dedica full un dia na dje. E siman siguiente e temanan lo bira Husticia, Enseñanza, etc., y e ta spera di por toca tur e temanan importante pa scucha den lineanan grandi, kico ta biba den e diferente institutonan aki, pa tin cuenta cune na momento di yega na un acuerdo di gobernacion y na momento cu nan traha nan programa di gobernacion.