Peaton di 77 aña a perde su bida ora auto a dal’e cerca di zebrapad den Pastoor Hendrikstraat

Ciudadano a haya accident apenas 30 meter leu di su cas 

• Vincent Rohan ta biba apenas 30 meter leu di e Zebrapad
• Su curpa a bay finaliza como 15 meter mas pabao di area di impacto

ORANJESTAD (AAN): Dialuna mainta a habri cu awacero torencial bashando cada rato den area di San Nicolas.  Mientras cu otro distritonan casi no a haya ni un druppel, na San Nicolas mes trafico a stagna debi na yobidanan duro, creando plasnan cu tabata stroba muchanan di bay scol mes.

   Pero ora cu a cuminza yega 10’or di mainta, e yobidanan a stop y solo a sali bek.  Claro cu ciudadanonan cu ta haci uzo di transporte publico, ta busca forma pa sconde pa e solo, net na e Abri (parada di Bus) cu tin den Pastoor Hendrikstraat net panort otro banda di caminda di Centro Medico ImSan.

   E mesun Dialuna aki, den oranan di merdia, yamada a drenta na Central di Polis pa indica cu un auto a caba di dal un persona na e Zebrapad banda di e Misa “Eben-Haëzer Kerk” na Pastoor Hendrikstraat 25, cu ta situa net 195 meter pariba di e Abri (Parada di Bus) ey, pariba di e cruzada cu Clavelstraat.

   Mesora Central a manda patruyanan di Polis pa eynan, y Centro di Alarma a pone ImSan Ambulance tambe na altura.  E lugar di accident ta net 290 meter leu for di e post di Ambulance.

   Na yegada di e prome patruya, nan a bin haya e victima masculino abao riba area cerca dilanti e cas Pastoor Hendrikstraat 23 y su situacion tabata mustra hopi critico.

   Ambulance a yega vap-vap na e lugar, y mirando e golpinan, a core stabilisa e victima y despues hise riba brancard, y sali cune cu maximo urgencia pa Servicio di Emergencia na Hospital.  Cu yudanza di multiple patruya riba caya, a percura pa cera e crusadanan importante pa asina e Ambulance por a yega lihe y sigur Hospital.

   Specialista di trafico y team Forensico di BFTO a presenta na e lugar pa haci nan investigacion y pone varios indicador forensico na e Zebrapad.  E lugar unda a haya e victima benta abao, ta como 15 meter mas pabao di e Zebrapad.  Pues e impacto cu e auto a ‘catapulta’ e victima basta leu.  Hasta su zapato tipo boots a kita for di pia, y tambe a keda benta como 20 meter mas pabao di e Zebrapad.

   Bureau Slachtofferhulp tambe a worde informa pa asina brinda asistencia na famia di e victima

   E situacion di e victima a keda critico henter Dialuna anochi y tambe Diamars mainta y atardi.  Sinembargo Diamars anochi ta drenta informacion lamentable cu pa 11:45 pm e victima di e accidente a fayece.

   Ta trata di e e victima Vincent Antonio Rohan, naci na Aruba dia 12 September 1948, pues tin 77 aña di edad.  E ta biba den Trinitariastraat, na e cas cu ta apenas 30 meter panort for di e lugar di impacto na e Zebrapad.  Tin un hanchi net pabao di e misa “Eben-Haëzer Kerk” pa por yega su cas.

    E victima a bira e di 9 morto den trafico pa aña 2025.  Vocero di Polis no a duna ningun indicacion di e persona den auto, pero a ricibi informacion di testigo cu e ta un Compact SUV color blanco, cu na final a keda mitar riba caminda y gran parti riba acera para.

   Un suplica ta bay na tur ciudadano y demas automobilista, pa bay trankilo den trafico.  Caya ta hopi druk, y si bo mester ta na un lugar mihor bo sali mucho mas trempan.  Evita di core cu velocidad halto, ban trankilo, cumpli cu reglanan, y pone bon atencion den trafico.

   Na famianan di Vincent A. Rohan, DIARIO y Cuerpo Policial ta manda palabranan di condolencia.