Situacion na WEB ta yega fase di escalacion

Expertonan ta mustra riba peliger di problemanan na WEB pa un compania vital y e pais - *Promesa pa mas dia di vacacion na WEB por mishi cu acuerdo pa asistencia di Hulanda - *DIARIO a publica tur informacion riba motibo di posibel retiro y Eagle ta djis un parti

ORANJESTAD (AAN) — Desaroyonan na WEB tin varios sector di Aruba sumamente preocupa.

Ayera informacionnan sumamente serio a alcansa DIARIO na momento cu tabata prepara e edicion pa awe.

Aparentemente Gerencia di WEB lo a dicidi cu e ta aumenta e cantidad di dianan di vacacion cu dos dia pa luna, loke lo a resulta den un situacion inaceptabel.

Informacionnan ta indica cu den e protocol cu a wordo cera, e gerencia di WEB por a dicidi con ta baha e gastonan di personal cu 12.6 porciento.  Pero si duna nan dos dia di vacacion, esaki ta nifica cu no tabata tin reduccion.

Aparentemente cerca personal e impresion a wordo crea ayera cu nan ta haya dos dia extra di vacacion pa luna, cu ta imposibel.

Segun informacion Gerencia di WEB no a consulta cu e fuentenan oficial cu nan mester a consulta pa a aumenta dianan di vacacion, manera den seno di personal ta bini dilanti.

Informantenan a indica cu no por mishi cu loke Hulanda a exigi sin pone henter e Acuerdo entre Aruba y Hulanda na peliger.

 “E situacion cu a wordo crea entorno di WEB, ta sumamente peligroso pa un pais, Mester tene na consideracion cu e companiad di awa y coriente di un pais ta asina importante pa bienestar nacional cu na un momento di un calamidad of otro peliger grandi hasta e prome medidanan di proteccion y seguridad mester wordo tuma na WEB. No por ta posibel cu na e momentonan aki ta surgi un situacion manera ta e caso.”

Cu intentonan lo a wordo haci hinca DIARIO den un pelea cu no ta di DIARIO, tabata algo cu por a spera. Esaki sigur ta e caso despues cu DIARIO a wordo acerca dor di gerencia pa un rectificacion di un articulo, despues cu DIARIO a skirbi den un articulo total riba loke Eagle LNG por nifica pa introduccion di gas pa produci awa y coriente na Aruba.

Gerencia di WEB a manda DIARIO un carta oficial pa pidi rectificacion pasobra e no ta na mesa cu Eagle N.V. pa negocia gas pa WEB. Pa DIARIO no tabata ta nada especial pa simplemente skirbi cu WEB no tabata na e lugar caminda nos a pensa cu e lo ta, si a tene na cuenta cu el a wordo introduci (segun portret cu DIARIO a publica) na Eagle LNG y a participa na reunion cu Eagle LNG y Prome Ministro.

Un punto cu DIARIO directamente a trece dilanti tabata, cu WEB ta un compania di estado pa cual finalmente Gobierno ta responsabel y pa cual Gobierno mester informa Parlamento y asumi responsabilidad enfrente Pueblo.

Na final Gerencia di WEB mes a cambia di opinion y a emiti un comunicado den cual el a mustra cu el a stop tur otro negociacion y cu pa e bay negocia cu Eagle.

DIARIO na mes momento a contesta WEB, cu ta peligroso pa stop tur relacion cu tur otro compania cu por entrega gas, si WEB ni Aruba a yega na un acuerdo final cu Eagle LNG y cu mester a pospone y no pone punto final na cualkier otro negociacion, manera por a comprende for di e carta cu gerencia di WEB mes a manda pa DIARIO.

DIARIO den asuntonan di WEB a basa su mes estrictamente riba e base legal di WEB pero tambe riba e base legal, e Estado di Derecho y democratico cu Aruba ta. Esaki a haci tambe cu DIARIO ta critica pensamentonan cu un Compania di Estado no por wordo controla manera mester ta dor di Gobierno y Parlamento pero tambe wordo sigui di acerca dor di periodismo cu tin deber di defende interes di un pais y su pueblo.

DIARIO awe ta presenta articulonan cu el a publica den cual Parlamento a wordo pidi pa controla loke ta pasa na WEB y ta bay investiga acuerdonan cu a subi mesa den cual ta wordo papia di acercamento cu tabata tin di parti di WEB cu e compania Hulandes Gasunie, cu tabata interesa den e pipa di gas di Nicolas Maduro y Utilities cu e tempo tabata wordo dirigi dor di Hoevertsz.

DIARIO no a mishi cu reputacion di ningun hende pero a haci su trabou ora el a pidi Parlamento pa bay investiga kico a pasa for di 2017 pero tambe tur e resultadonan cu e por tin mas ainda si for di 2017 mester a bira conoci kende ta e candidatonan pero te awe ningun hende sa kende ta e candidatonan.

DIARIO awe cu prueba ta presenta loke el a pidi Parlamento investiga pero informacionnan alarmante di ayera ta indica riba escalacion pisa na WEB, cu ta compania vital di Aruba.