ACTPOL App ta bay haci trabao di polis mas eficiente y safe

The content originally appeared on: Diario

ORANJESTAD (AAN): Diamars atardi na Centro di Husticia na Santa Cruz a tuma lugar un conferencia di prensa, unda cu minister di Husticia Rocco Tjon a anuncia cu KPA ta bay introduci e asina yama ACTPOL app.


“Mi ta kere cu esaki ta un momento hopi importante unda cu informacion ta bay wordo uza mas mihor y e ta bay ta mas accesible tambe pa tur nos coleganan cu ta traha riba caya”.

E app tin dos funcion hopi importante.

Na un banda e agente policial aworaki atravez di e smart phone aki tin acceso na tur informacion, segun Tjon.

El a splica cu si por ehempel un polis kier controla un auto, e por haci esaki atravez di e ‘mobile app’ aki y no mester depende mas netamente di e asina yama ‘Centrale Meldkamer’.

E mandatario a splica tambe cu ora cu un polis bay duna asistencia, e por haya tur informacion necesario unda cu nan por atende cu e caso na un manera hopi mas safe pa nan mes.

Esaki pasobra via e app nan por haya sa e historia por ehempel di e adres cu nan ta bay bishita.

“Mi ta kere cu esaki ta un stap hopi importante den cuadro di uza informacion y inteligencia mas mihor pa combati criminalidad, pero mas importante ainda ta cu atravez di e app aki ta bira posibel tambe cu bo ta eleva e seguridad di cada colega cu ta haci nan trabao riba caya”, segun Tjon.

El a sigui bisa cu esaki ta stap 1, esta un proyecto piloto y dentro di 3 luna tur e agentenan policial cu haci uso di e sistema nobo ta bay por duna nan feedback, pa asina si mester lo haci adaptacion.

E minister a indica cu den e prome cuartal di otro aña lo cuminza cu un otro proyecto piloto, caminda cu ta bay introduci e asina yama Mobile Data Terminals, unda cu entre otro lo instala laptops y printers den autonan di polis.