Diasabra tin evento ‘Gifts and Joy Christmas Bazaar’ na Pasadia Briyo di Solo na Piedra Plat

Señora Jacqueline Richardson:

ORANJESTAD (AAN): Pa Pasadia Briyo di Solo, diasabra 6 di December ta un dia grandi. Recientemente DIARIO a combersa cu señora Jacqueline Richardson, Guia y Relacionista Publico na e centro, kende a splica di e Gifts and Joy Christmas Bazaar cu lo tuma luga diasabra awo.

   Na e bazaar lo bay tin bendemento di articulonan, obranan di man di materiarlnan cu a wordo recicla, cu clientenan di Pasadia Briyo di Solo ta traha. Entre otro, tin habon, bela, y e proyecto di te. Lo tin bar y cushina bon surti cu cos dushi di Pasco. Lo tin DJ y un banda sorpresa.

   Señora Richardson a splica cu e motibo pa kico nan ta haci e bazaar aki, ta pa recauda fondo pa e centro pero specialmente pa nan por yega na nan mesun luga na unda nan por realisa miho e proyecto di te y traha nan te eynan. Pa contribui den recaudacion di fondo pa e proyecto di te prome cu e bazaar diasabra awo, por bay riba pagina di Facebook di Pasadia Briyo di Solo pa haya mas informacion.

   Señora Richardson, den nomber di Pasadia Briyo di Solo, ta invita comunidad di Aruba pa pasa bin pasa un anochi dushi cu nan diasabra dia 6 di December na e centro na Piedra Plat 97-A for di 6:00 pm te cu 10:00 pm.