Benny mester defende su mes contra otro acusadonan

Caso Avestruz ta presenta momentonan spectacular den politica

• Benny como haraña ciego den un neishi di hende bibo?
• Benny mester proba cu e ta victima di hende cu el a confia 

ORANJESTAD(AAN)- Cu basta interes comunidad di Aruba ta en espera di e momento cu e caso Avestrus lo conoce continuacion den sala di Corte di Aruba.

DIARIO ta copilando puntonan di interes cu for di diferente direccion ta drenta y cu ta mustra riba aspectonan excepcional cu e caso aki tin den historia di persecucion legal na Aruba.

E caso aki ta basa riba loke por bay robes den e sistema politico di Aruba, cu ta basa riba donacion na partido y politico pa asina nan por haci nan gastonan pa nan por gana durante eleccion.

Con placa lo a atende cu e “curazon berde” di Benny Sevinger, ta un asunto cu awor ta wordo atende den sala di Corte di Aruba, cu na varios ocasion a mira politiconan di e pais defende nan mes contra acusacionnan penal di Ministerio Publico.

Den e caso di Benny Sevinger tin aspectonan special cu ta hunga un papel.

Na prome lugar naturalmente e cantidad record di persona cu mester presenta dilanti Huez ta papia pa su mes.

Pero for di momento cu e caso a nace den comunidad, tabata tin pregunta riba e webonan den e neishi di Avestruz.

Webonan cu a haya splicacion straño den e posicion cu Benny Sevinger a tuma for di momento cu el a declara cu e tabata completamente inocente y hasta e impresion a wordo crea cu Benny Sevinger ta victima di hende cu el a confia.

Esaki ta uno di e puntonan importante pa publico na momento cu defensa mester presenta den e caso aki.

E prome reaccionnan di Benny Sevinger y su defensa, awor ta crea e suspenso kico lo pasa den e proximo parti di e caso, ora e acusadonan mester defende nan mes.

Si bay tras di declaracionnan cu a wordo haci dor di Benny Sevinger y su defensornan, ta topa cu e realidad, cu e haraña Benny (segun e nomber cu el a haya durante tratamento di su caso) kier separa su mes di e neishi cu lo a produci placa pa e bay eleccion y a ricibi fabor di su parti.

Uno di e declaracionnan durante e etapa mas tempran di e caso, a bini for di e campo di defensa di Benny Secinger, cu a indica cu “algo a pasa pero cu Benny ta inocente”.

Pues algo a pasa, loke por wordo interpreta tambe como aceptacion cu un investigacion y posiblemente persecucion ta na su lugar.

Kico a pasa, ta loke Corte di Husticia mester dicidi.

E pregunta ta keda mientrastanto kico a pasa y kende a haci cu algo a pasa. Sin Benny, con e neishi a wordo forma?

Cual ta e webonan den neishi di un avestruz, cu segun Benny no ta Benny?

Un pregunta mas serio ta keda presente cerca publico cu a sigui e desaroyonan for di nan prome etapa.

Benny lo a bira victima di hende cu el a confia. Kende el a confia? Con el a confia e hendenan cu el a confia? Pakico el a bira victima den e caso den cual el a bira figura central?

Tin cierto parti inexplicabel den e caso aki. Manera e acusacion cu lo a bende e webo prome cu e avestruz lo a pone e webo.

Esaki sigur a bini dilanti den e supuesto  acuerdo pa benta di tereno prome cu e tereno lo a keda otorga dor di Benny Sevinger.

Interesante den e caso aki sigur ta keda pues, cu Benny Sevinger no a mira nada. E ponencia na inicio di e scandal, cu el a bira victima di su buena fe politico cu asina ta duna si e impresion cu e mester tabata tin bon relacion cu e acusadonan.

No ta tur hende cu hende topa, por confia den bida y ta sumamente dificil pa acepta cu un persona cu ta Ministro ta confia tur hende y ta firma asina tereno pa tur hende sin mira kico e ta firma.

Sin duda e caso aki lo pone fin na hopi amistad cu por tabata existi prome cu e scandal a rementa pa Aruba conoce e misterionan di un neishi di haraña y un avestruz cu tabata come mientras hende a kere cu su cabez tabata dera den santo.