Atakenan di parlamentario Dowers riba Procurador General ta inaceptabel

The content originally appeared on: Diario

Prome Minister den Parlamento:

ORANJESTAD (AAN): Diahuebs ultimo den e reunion publico den Parlamento, un biaha mas Parlamentario Arthur Dowers a ataca Procurador General. Ya ta di dos reunion publico den cual e parlamentario ta haci esaki. Por scucha e atakenan aki den e grabacion di e reunionnan di Parlamento. Prome Minister Evelyn Wever-Croes a expresa cu ta incomprendible cu un ex minister y un hurista, ta ataca e PG constantemente y atacha e imagen di nos Ministerio Publico. Minister President, den Parlamento a lamenta cu e parlamentario ta expresa su mes di e forma aki.

            “Si Arthur Dowers kier defende Benny Sevinger cu ta sospechoso di corupcion, ta su escogencia personal. Ami lo tin berguensa di haci esey, pero esey ta nan asunto. Pero di eynan pa bo bay ataca y ofende PG cada biaha cu bo haya gana, esey si ta dimas”.

            Ministerio Publico y Procurador General na Aruba ta institutonan independiente, y cu den un pais manera Aruba mester wordo respeta. Y esey ta conta pa Parlamentario Arthur Dowers tambe. En bes di para den Parlamento, defende corupcion, defende Benny Sevinger, e parlamentario mester para den Parlamento y denuncia y rechasa corupcion, rechasa e hecho cu un sospechoso di corupcion ta ocupa e funcion di Parlamentario.

            “Mi a haci un apelacion riba e parlamentario pa stop cu e atake y ofensanan aki, pasobra esey no ta loke nos pueblo kier mira”, Minister President a contesta Parlamentario Dowers den Parlamento diahuebs ultimo.