EPB Oranjestad hopi satisfecho cu porcentahe di graduacion a yega 87 porciento

Director ta mira un demanda grandi di horeca pa graduadonan

ORANJESTAD (AAN): Sigur e aña escolar di 2021-2022 ta uno caminda EPB Oranjestad a briya cu su logro academico.  Esey ta loke e director Erwin Lopez a indica den un entrevista.

   El a bisa cu sigur EPB Oranjestad na Hato ta hopi satisfecho cu e biaha aki nan a yega na un porcentahe di 87% cu a gradua.   El a compara esey cu e aña escolar anterior, unda nan a yega maximo di 75%.  “Esey ta un adelanto basta grandi,” Lopez a indica cu un sonrisa riba su cara.

   El a splica cu e prome resultado di loke ta ser yama “1e Tijdvak” no tabata hopi alentador.  Sinembargo algo a pasa, unda e hobennan a wordo stimula, y e resultado den “2e Tijdvak” a produci un cambio drastico den resultado.  Pesey hopi alumno a gradua.

    Lopez a bisa cu e ta contento, y sigur a admira e trabao inmenso di e docentenan, cu a haci hopi trabao, y dedica hopi di nan tempo liber pa yuda e alumnonan pa yega asina leu.

   Con bin cu e alumnonan a haya un impulso asina positivo pa haci nan examen bon?  Segun Erwin Lopez, e tin e teoria cu algo di e Pandemia cu Aruba a pasa aden a trece dilanti cerca cada alumno, pa mira con importante nan estudio ta.

   “Mi no sa kico exactamente a socede, pero mi ta hopi contento cu el a pasa si y asina e resultadonan a bay dilanti,” e director di EPB Oranjestad a indica.

   Retonan durante pandemia: Segun Lopez, e reto di mas grandi cu EPB Oranjestad a pasa aden sigur ta e Pandemia.  Debi na e crisis causa pa Coronavirus, ta hopi les a cay afo.

   El a splica cu e hobennan cu a gradua e aña aki, ta e alumnonan cu durante periodo di Covid-19 a keda pa hopi tempo na cas, y tabatin hopi docente tambe contagia, y tabatin situacion unda varios alumno a cay afo pa tempo largo debi na e malesa.  Pues ‘lesuitval’ tabata grandi na EPB Oranjestad.  “Nos tin un scarcedad di maestro cu tambe ta un problema grandi pa nos,” Lopez a mustra.

   Horeca enbusca di recien graduado: A puntra e director di EPB Oranjestad, si acaso nan ta haya peticion di comercio pa pidi e scol enfoca riba cierto materia pasobra tin scarcedad di empleado den e sector ey.

   Aki Lopez a bisa, cu esey ta algo cu ta pasando keto bay!  Principalmente e sector di Horeca ta keto bay enbusca di principalmente alumnonan cu a gradua como koki.

   “Nos alumnonan di koki aworaki ta hot-in-demand”.   E Director a hasta bisa, cu tin biaha nan ta teme cu un alumno ta bay core stage y no ta regresa mas pa finaliza nan estudio, pasobra e negoshinan ta pidi nan pa nan keda.  Pero e alumno toch ta regresa pa asina traha riba su diploma.

   Fuera di esey, EPB Oranjestad ta nota hopi demanda pa esnan cu ta finaliza estudio di Electro, tambe den Bouw, y principalmente tambe den Verzorging, como cu na Aruba no tin mucho hende den cuido, y e parti di esaki ta creciendo poco-poco mas, como cu envehecimento ta creciendo.

   Riba e potret por mira Director Erwin Lopez (robez) hunto cu Rensley Mathilda kende ta director di EPB San Nicolas.