Posible dos caso di Bruela di Macaco na Guyana Frances

CAYENNE: Ta parce cu na Guyana Frances na Sur America, lo a detecta dos posible caso di Bruela di Macaco. 

Esey ta loke e corant Times of Suriname a raporta.  E corant ta papia di ‘casonan sospechoso’.

   Organizacion Mundial di Salud (WHO) ta califica e brote di Bruela di Macaco inusual pero manehable pa awor.  Realmente e virus di e malesa aki solamente ta comun na algun parti di Africa, pero a aparece na Europa dia 7 di Mei.  For di e dia ey, ya a registra 131 caso na 19 pais, y 106 caso sospechoso.

   E virus no ta plama facilmente entre hende, pero e por wordo transmiti via di contacto directo cu e persona, of ora cu bo mishi cu articulonan cu e persona contagioso tabatin, manera paña of hasta laken of cusinchi di cama.

   Mayoria di hendenan cu wordo contagia, ta recupera den algun siman caba.