Pa deporte of fiesta paden ta permiti 150 persona y pafo esaki ta 250

ORANJESTAD (AAN): Durante un conferencia di prensa di Gobierno Diahuebs, Sharline Koolman di DVG a papia riba e ultimo desaroyonan pa loke ta COVID-19.

Koolman a cuminza na papia riba e asina yama code geel den cual Aruba ta aden.

“Den e codigo geel cu nos ta aden, pa e parti paden di un restaurant e ta keda cu ta 8 persona maximo por sinta na un mesa”.

Bishita di famia, fiesta etc. por bay te cu 150 persona, semper teniendo cuenta cu e distancia di 1.5 meter.

Pa deporte paden tambe e maximo ta 150 persona, mientras cu pa barnan of rum shops por tin 8 persona sinta na mesa, segun Koolman, kende a indica cu un maximo di 5 persona por haci entretenimento (banda etc.).

Pa loke ta parti pafo, na restaurantnan e maximo na un mesa ta keda 8 persona, mientras cu hendenan cu por ta na un fiesta ta 250 y esey ta conta tambe pa deporte.

Pa bar y rum shops e ta keda 8 persona na mesa y pa entretenimento e maximo cantidad di musico of otro tipo di entertainer ta keda 5.

“Pa e parti di entiero ainda e ta keda 250 persona, dependiendo di grandura di e lugar”.

Pa loke ta por ehempel hotelnan, e medidanan di e negoshi ta keda vigente, sin extra medida.

Transporte publico ta keda normal, pero semper cu uso di tapaboca, segun Koolman.

El a sigui bisa cu horario di ciere siman pasa a hala pa 11’or pa 1’or pa e empleadonan por keda 8 ora na trabao y cobra nan salario normal y esey ta keda asina.

Pa locual ta e medidanan di precaucion tur cos ta keda mescos, pues e tapaboca, e distancia social y limpieza constante di mesa, porta etc.