Ciudadano a keda warda henter 2021 pa un contesta encuanto su malesa di wowo

Ni un carta nan a haya bek!

ORANJESTAD (AAN): Un conocido ciudadano kende a haya problema cu su wowo, desde luna di April pasa caba den consulta cu su Docter, a dicidi cu e por haya yudanza sigur na Hulanda pa asina ‘fix’ e problema di wowo aki.

   Su Docter na un forma profesional, a traha un carta y a dirigi e pashent aki pa specialista cu tin su sede na ImSan na San Nicolas pa asina por traha riba e proceso aki pa asina e por haya un forma rapido pa haya yudanza na Hulanda.

   Esey ta debi cu e problema di su wowo aki no por wordo trata na Aruba (ainda), pero sigur na Hulanda ya nan ta hopi avanza pa coregi e problema aki, y den pasado na varios ocasion caba a yega di manda pashent pa eynan.

   E ciudadano a hasta haya cita na e lugar na ImSan y tur examinacion di su wowo a ser tuma.

   Pero ya 2021 a finaliza, y nunca mas e ciudadano, ni su Docter no a haya un contesta mas.

   E ciudadano a indica na DIARIO, cu el a keda desapunta cu falta di profesionalismo unda ta ni tin e decencia di duna contesta.  Siendo cu awendia tur cos ta bay via email, y cu tin hopi specialista cu ta manda resultado instantaneo pa Docternan rond di Aruba.

   Como cu e ciudadano aki ta un persona conoci na San Nicolas, el a hasta combersa tambe cu algun ‘insiders’ di AZV, kendenan a mustra cu casonan similar a wordo manda pa Hulanda regularmente, y cu nan no ta compronde di con for di April 2021 ainda e no a haya contesta.

   Recien e ciudadano a lesa con na ImSan recien esnan di Servicio di Emergencia a rechaza di duna servicio na un Arubiano cu ta di vacacion.  Y e ta mira cu e tambe den su caso, nan ta djis pone su asunto den ‘lachi di olvido’ y no ta ni dune un simple contesta di sea “si” of “no”.

   E kier sa si acaso tin mas hende di San Nicolas cu ta kedando desapunta cu e servicio di ImSan, pasobra e mes semper tabata orguyoso cu Aruba a haya un joya di edificio pa brinda cuido di salud, pero e ta mira cu kizas e briyo di duna cuido ta conta pa cierto hendenan so, y no pa otro grupo.