Fecha pa entrega e formulario yena: entre 13 pa 17 di September awo na seccion bijstand San Nicolas

Jesseline Kelly, PR di DAS, na mayornan:  *Hacie na tempo pa haya e extra ayudo y no blokia bo bijstand

ORANJESTAD (AAN) – E relacionista Publico di Departamento di Asunto Social (DAS), señora Jesseline Kelly, a sigui splica den conferencia di prensa, cu e formulario cu e mayornan cu ta riba bijstand mester yena, pa haya e ayudo extra pa nan yiunan cu ta bay scol mester wordo completamente yena. El a splica cu cada famia a haya caba un schedule cu e fecha di entrega.

E aña aki un biaha mas, DAS ta traha cu e schedule aki pa evita aglomeracion. “Facil, tras di bo carnet di bijstand, tras di e leter ‘O’ ta sigui un leter ‘K’. Bo ta wak e leter cu ta sigui e leter ‘O’ y a base di esey, bo ta bay wak riba ki dia, bo persona mester pasa na nos oficina situa na San Nicolas, ex-Centro Medico, pa entrega e formulario. Tur aña, e dia aki ta hopi importante pasobra ta un dia cu ta consisti di un control general di parti di bijstand. Pesey nos ta pidi pa por fabor cumpli cu e formulario di scol aki, riba e dia stipula, pa asina bo por evita cu e cosnan no ta bay cana bon pa loke ta trata e pago di October 2021”, Jesseline Kelly a remarca.

Kelly a splica tambe, kico ta pasa cu e mayor no cumpli cu yenamento di e formulario di scol. “Bo bijstand pa luna di October ta keda blokia; e ta baha, bo no ta bay ricibi e 250 pa cada mucha, manera ta custumber cu bo ta ricibi tur luna, y tambe ora cu e wordo ahusta bek, pues dia cu bo ta trece e formulario cu ta laat e ta bay wordo ahusta pero sin forza retroactivo. Pesey, nos ta pidi por fabor pa tene bon cuenta cu entregamento di formulario”, Jesseline Kelly a subraya.

El a sigui bisa cu desde dialuna 13 te diabierna 17 di September awo por entrega e formulario, y cada leter tin nan dia specifico. “Diabierna 17 di September nos ta tine habri pa tur persona cu, pa un of otro motibo, no por a bin riba nan dia stipula al menos tin e posibilidad pa trece diabierna. Pues, nos ta haci nos maximo esfuerzo un biaha mas y nos ta pidi tur persona pa por fabor cumpli cu esaki, pa asina e seccion di bijstand tambe por cumpli cu bo, sin ningun problema den luna di October 2021”, Jesseline Kelly a remarca.

E PR di DAS, a haci un invitacion pa subi DAS su pagina di Facebook, like, y eyriba, durante e dos simannan aki, ta bay haya tur e informacion tocante esaki. Si un persona pa un of otro motibo, no a haya e noticia  por fabor bisa un hende cu ta den bijstand, yuda plama esaki, pa tur hende por cumpli nechi manera mester wordo cumpli, pa por ricibi e ayudo financiero aki, e aña aki, un biaha mas.

El a agrega cu normalmente, e ayudo aki ta wordo duna den Luna di September, pasobra normalmente scol ta habri den Luna di Augustus. Mescos cu aña pasa Gobierno a aplaza e apertura di scol, y a hacie na September. “Ley ta papia specifico, cu un bez cu scol habri e famia mester entrega e comprobante cu e yiu ta bay scol, y pa e motibo ey e aña aki, un biaha mas, nos a haya nos ta hala e fecha di e ayudo pa Luna di October. Y nos tur sa, cu pa ora scol cuminza bo tin gasto y e ta cay fastioso pero nos ta bay cumpli cu e ayudo aki pa Luna di October”, Jesseline Kelly a reitera.