“Grant Thornton Aruba Academy” a wordo lansa oficialmente

The content originally appeared on: Diario

ORANJESTAD (AAN ) – Diahuebs di e siman aki, a keda lanza e “Grant Thornton Aruba Academy” door di señor Edsel Lopez, ken ta un partner di Grant Thornton Aruba.

Den un entrevista cu Matutino DIARIO, Lopez a splica cu e idea tras di e Academia aki ta comparti, cu comunidad di Aruba, nan conocemento y experticia cu nan tin encuanto temanan manera tax, exchange, finanzas, entre otro.

Lopez a bisa cu e trainingnan cu nan ta bay duna, no ta solamente pa profesionalnan, pero pa henter e comunidad, y un y tur cu kier engrandece nan conocemento tocante temanan specifico, por ehemplo di belasting cu ta hopi actual, cuentanan anual, etc., cu ta temanan cu nan ta bay cubri den e lunanan cu ta bin dilanti.

El a agrega cu nan a scoge pa desaroya un “state-of-the-art meeting room” pasobra door di haci esaki lo haya mas intercambio di ideanan cu otro, of si haci “webinar”. Lopez a indica cu nan a ripara cu den sala chikito e participantenan ta bin mas cerca di otro y ta comparti nan conocimentonan. Esaki ta e set up cu nan ta bay haci cu 15 pa 30 hende den sala pa e proximo lunanan.

Edsel Lopez a expresa cu e ta sumamente orguyoso y contento di e team cu nan tin, cu a yuda den un periodo cortico pa hinca esaki den otro. E proyecto aki  nan kier a ehecute for di hopi tempo caba, pero door di covid-19 hopi cos no por a haci, pero aworaki nan ta ranca sali y nan ta hopi anima cu esaki.