Anyi a gana bon placa cu wega di Zodiac

ORANJESTAD (AAN): Un di e weganan di mas popular di Lotto keto bay ta Zodiac. 

Aki bo ta escoge un number consistiendo di cuatro cifra, y bo ta agrega un signo zodiacal y ya bo ta den wega.

   Esey ta loke Anyi a haci, y a keda feliz pa mira cu el a gana tambe.

   Pesey mes riba Diaranson el a acudi na oficina di Lotto na Playa pa reclama su premio. Aki el a entrega su ticket na funcionario cu a revisa esaki.  Ora di scan e barcode, e computer a confirma cu Anyi a gana 10.200 Florin.

   Mesora a sigui cu e proceso pa transferi e premio electronicamente pa su cuenta di banco.

   Anyi a bisa cu e ticket ganador mes el a cumpra na Indio Stewart Lottery na Santa Helena.