The content originally appeared on:
Diario
*E ta spera cu di dos parti keda cla prome cu December
ORANJESTAD (AAN) – E Presidente di San Nicolas Business Association (SNBA), Errol de Freitas, ta hopi contento cu e drechamento di Caya, na San Nicolas den su prome parti, a keda cla.
No obstante, e realidad ta cu ainda falta e di dos parti y e ta spera cu prome cu December, esaki tambe keda cla pasobra e tin hopi aña den planning.
“No solamente esey, den e vision cu nos ta bezig entregando Gobierno, cu nos a traha cu nan durante e ultimo seis añanan, y aworaki e ta biniendo pa nan por wak kico e ta, pa nan por pasa nan pen cora tambe, y pa despues e no keda den plan, pero pa wordo ehecuta tambe” de Freitas a señala.
El a reitera loke el a bisa durante su discurso na apertura di e Job Center na Secrets. El a subraya cu e ta hopi orguyoso di un estadistica, di e cantidad di hendenan cu a bay aplica na Secrets. “SNBA a haci un apelacion na Arubianonan pa bay aplica, y esey ta sosodiendo. Kiermen, e hecho cu nan ta bisa cu Arubiano ta floho of cu e Arubiano no kier traha, mi ta imagina mi tur caminda tin e situacion ey, pero tambe nos tin cu motiva nan; nos tin cu paga nan drechi, y nos tin cu zorg pa prepara nan pa locual ta bin”, Errol de Freitas a acentua.
El a reitera cu e ta spera cu esey lo sosode prome cu fin di aña. El a remarca cu den e vision di San Nicolas bo ta haya full un cambio. “E ta bay ta full un cambio bayendo straight na Carnival Village. Kiermen e lugarnan cu ta bay trek negoshi pa pariba, loke nos ta sperando di e negoshinan y nos miembronan tambe, ta cu nan ta weita oportunidad den esaki, pa nan mira e tipo di negoshi, e tipo di tienda, cu nan mes lo ta prepara p’e”, Errol de Freitas a señala.
El a agrega cu e ta bay ta mas gastronomic. “Nos ta mirando cu Secrets no a explota tur locual ta ‘food & beverage’ cu shopping, etc. Nan a tene na palabra cu shopping ta sosode aki bao. Anto p’esey, e avenida bayendo pa Colony lo haci e distancia mas corto, loke ta importante. Asina señor Errol de Freitas a remarca.
