Drs.Marion Agunbero ta bira miembro di Colegio di Supervision Financiero di Aruba

The content originally appeared on: Diario

ORANJESTAD (AAN): Conseho di Ministernan di Reino a aproba riba dia 21 di juni 2024 e proposicion di Aruba pa nombra señor drs. Marion Agunbero

como miembro di Aruba den e Colegio di supervision financiero pa Aruba (CAft) entrante 1 di augustus 2024.

   E ta sigui señora mr. dr. Hellen van der Wal cu despues di 2 termino no por wordo reeligi mas. Señor Agunbero tin experiencia amplio den e sector financiero y a ocupa diferente funcionnan na entre otro Banco Central, entre otro como manager seccion di supervision  y tambe na Departamento di Finansas, caminda e tabata director.

    E tabata director ehecutivo di e fondo di pension den e sector di turismo di Aruba y a ocupa diferente posicionnan na Caribbean Mercantile Bank N.V., entre otro como assistent managing director retail products. Actualmente e ta miembro di e Conseho di Comisario di Caribbean Mercantile Bank N.V. y miembro di e Conseho Consultativo di Aruba, unda e lo tuma su retiro pa asumi e cargo nobo como miembro di CAft.

   Gobierno di Aruba ta gradici señora Van der Wal pa tur e trabou cu el’a desplega den CAft den nomber di pais Aruba, y ta desea señor Agunbero hopi exito.