Grupo di Douane Ambtenaar cu a haya diploma na 2023 ainda no por a huramenta

Edward Maduro, lider di SADA:

*Gobernador a manda instruccion pa Director no huramenta nan

*Esaki pa motibo di un pasado disciplinario 

ORANJESTAD (AAN) – Lider di Sindicato di Aduana (SADA), señor Edward Maduro, den entrevista cu DIARIO a elabora riba e hecho cu un grupo di Douane Ambtenaar, cu a caba nan opleiding na 2023 y a ricibi nan diploma, te ainda no por a huramenta.

            Maduro a splica cu ora un Douane Ambtenaar ta drenta den dienst, ta bay un opleiding, ora e caba ta haya su diploma, y ta huramenta di biaha pasobra na e momento ey ta bay drenta den e “werk groep”, kiermen ta drenta traha.

            “Loke a sosode ta cu tin un grupo cu a caba nan opleiding na comienzo di 2023, a haya nan diploma, y si tur cos tabata bon mester a huramenta for di e tempo ey caba, pues nan tin mas cu un aña y mey trahando sin huramenta”, Maduro a bisa.

            E lider sindical a sigui splica cu durante e ultimo huramentacion cu tabata tin na aña 2019, SADA a manda un carta pa Gobernador, den cual nan ta bis’e cu e sindicato no ta di acuerdo cu e director di Aduana ta realiza e huramentacion, pasobra e tin un pasado disciplinario y SADA ta bisa cu e no ta na su lugar.

            SADA a manda un carta na 2019 pa Minister di Finanzas tambe, unda nan ta bis’e cu no ta na su lugar p’esaki tuma lugar. Kiermen, Gobierno mester a busca un solucion desde 2019, cu tabata tin e mesun Minister di Finanzas cu tin aworaki.

            No mester a warda te aworaki cu tin un grupo ta bay huramenta y cu Gobernador a duna instruccion pa e director di Aduana no huramenta nan, segun Edward Maduro ta indica.

“Pero e problema t’ey mester a wordo soluciona cuater of cinco aña pasa. Lamentablemente, esey no a tuma lugar. Conociendo e director nos sa cu e ta bay ‘blame’ SADA, pero SADA tin prueba cu no ta su falta pero e ta culpa di e mesun persona aki, y cu e minister no a tuma accion, y awo nos ta sinta cu e problema. Na final di dia un grupo di ambtenaar ta keda sin huramenta, pero no ta culpa di e sindicato, e sindicato ta haci tur cos corecto”, Edward Maduro a señala.

            Edward Maduro a duna di conoce cu nan ta na spera cu un contesta di e Minister pa wak ki solucion ta bay tuma, pasobra mester busca un solucion pa e situacion aki.