The content originally appeared on:
Diario
El a haci su entrada na momento crucial pa bon maneho di Aruba
Na inicio di e decada di reto, un historia excepcional a cuminsa
ORANJESTAD (AAN) Na un momento culminante den historia di Aruba, Evelyn Wever-Croes a haci su entrada den mundo politico di Aruba.
Su relacionnan familiar sin duda, a duna su caminata den mundo politico di Aruba un aspecto especial.
Un dama a presenta su mes pa dirigi e partido, cu a produci hombernan cu a cambia destino di nan pais.
Na e momento cu Evelyn Wever-Croes a haci su entrada, Aruba mes no tabata na haltura con grandi exigencianan di futuro lo tabata na Siglo 21.
Entrada di Evelyn Wever-Croes tabata directamente despues cu mundi a bandona un recesion pero tambe cu tur indicacion tabata, cu Aruba mester lubida e posibilidad cu un compania petrolero por a bira e toke magico pa futuro di Aruba.
Recesion mundial tabata exigi cambio na un mundo, cu mester a enfrenta e culminacion di tecnologia pero tambe adaptacion na oportunidadnan nobo y necesidad di maneho fuerte.
Evelyn Wever-Croes a haci su entrada na un momento cu su partido mester a atende cu e euforia cu a wordo presenta na Aruba cu a kere cu e por a baha su BBO, sin haya su mes cu problema serio.
Evelyn Wever-Croes no a bira heredero solamente di un nomber di familia, cu ta genera expectativanan importante den Pueblo di Aruba, pero den su capacidad di lider politico di MEP, heredero di e forma cu MEP, lo por a saca Aruba for di e abismo financiero cu e reduccion di BBO a trece cune.
Evelyn Wever-Croes na 2017 mester a bira Ministro Presidente di un Aruba practicamente bancarota, cu mester a atende cu Reino Hulandes pa asina haya e formula y sosten necesario pa por a scapa e Florin Arubano, cu Gobierno Mike Eman a tira den awanan sumamente turbulento.
Cu esfuerzo grandi, hunto cu un team di Ministro cu sigur merece elogio, el a logra porfin alcansa un saldo positivo pa presupuesto di Aruba, pa imediatamente despues cera porta di Aruba y asina economia di e pais, pa evita cu Covid-10 lo a causa morto y destruccion humano na e pais.
Evelyn Wever-Croes como Prome Ministro di Aruba a bira e aporte mas positivo y alentador pa e Pueblo cu mester a cera su portanan pa turismo despues cu ya e mal maneho cu Evelyn Wever-Croes a hereda di Gobierno Mike Eman, a exigi un tempo cu no por a priminti e Pueblo di Aruba ningun regalo politico.
Loke Evelyn Wever-Croes a entrega Aruba tabata resultadonan cu poco hende a spera.
Aruba a recupera y Aruba a sigui cana te awe bay dilanti na man di Evelyn Wever-Croes cu awe merece aplauso total pa e forma cu el a sabi di saca Aruba for di abismo y entrega Aruba speranza nobo y reconocemento internacional pa e forma cu Aruba como pais chikito a sabi di crea un futuro.
Awe DIARIO ta reconoce den Evelyn Wever-Croes e lider cu Aruba tabata tin mester pa Aruba por a sigui nabega den un mundo di problema tras problema.
Es mas! Na e momentonan mas dificil, tabata e empuhe positivo di Evelyn Wever-Croes como lider cu a duna Aruba animo pa sigui cana pa awe ricibi aplauso mundial.
Evelyn Wever-Croes na momento cu e ta celebra su tercer lustra como politico na Aruba, ta entrega comunidad di Aruba e regalo cu solamente conocemento, trabou y amor pa un pais por logra pa un nacion!
