Zsolt Szabó kier pa start investiga corupcion den Caribe Hulandes

ORANJESTAD (AAN): Secretario di Estado pa Digitalizacion y Relacionnan di Reino, esta Zsolt Szabó a haci yamada pa investigacion urgente riba corupcion den tur parti di Reino Hulandes. 

Papiando den fin di siman, Szabó a expresa su preocupacion encuanto e fayo di atencion cu Transparency International esta T.I. (un organizacion mundial anti-corupcion) cu a duna na tur islanan Caribense di Reino Hulandes, ora cu a examina corupcion den Hulanda europeo.

   El a enfatisa riba Caribe Hulandes, y esaki ta nada sorprendente!  Mirando cu na Aruba mes, ya caba 2 ex-Ministro di AVP a wordo sentencia cu castigo di prison pa nan forma coruptivo di goberna.  Tambe recien aresto di Parlamentario na Curaçao.

   Szabó a enfatiza e necesidad pa trato igual den esfuerzonan anti-corupcion den henter Reino, bisando cu Transparency International no mester djis limita su enfoke pa cu teritorionan Europeo.  Corupcion ta un problema mundial cu ta rekeri atencion tur caminda, incluyendo na e islanan Caribense.

   El a bisa cu ya caba el a start combersacionnan cu Transparency International na Hulanda, y cu e tin planea pa cuminza cu contactonan cu nan sede na Berlin pa garantiza e apoyo pa investigacionnan completo y inclusive.

   Tambe Szabó a subraya e importancia di e colaboracion cu Gobiernonan di e islanan di Caribe Hulandes.  “Pa fin di 2024, nos meta ta pa tin un kader pa midi corupcion den parti Caribense di Reino.  Esaki ta rekeri un dialogo activo cu lidernan local pa asina hunto duna e esfuerzonan aki un forma,” el a bisa.

  E anuncio a bin mey-mey di preocupacionnan di hopi tempo caba di politiconan na Den Haag encuanto gobernacion y transparencia na Aruba, Curaçao, y St. Maarten.

   Nuebe aña pasa, Transparency International a yega di saca un rapport devastador encuanto loke ta pasando na St. Maarten, mustrando riba varios vulnerabilidad critico den e forma cu gobierno ta funciona eynan.  Controlnan debil den sector publico, cu casi nada di transparencia, cu casi nada di mecanismo di control.  Tambe a boga pa bin cu mihor transparencia den financiamento di partidonan politico na St. Maarten, y e forma con hopi influencia tin na e isla cu e sistema di ‘padrino’ pa haya fabor politico.

   E medidanan anti-corupcion cu Szabó a propone ta pa yuda atende debilidadnan sistemico, pero toch apoyando colaboracion entre partnernan di Reino.  “Gobernacion limpi ta e fundacion pa crea un economia fuerte y sirbi pueblo efectivamente,” el a bisa.

   Pa logra esaki, Szabó ta planea pa discuti e proximo investigacionnan anti-corupcion cu lidernan di Caribe Hulandes.  El a enfatiza e necesidad urgente pa e islanan di Aruba, Curaçao, y Bonaire bin cu auto-suficiencia mas grandi.