The content originally appeared on:
Diario
David Barkmeyer ta pidi botonan chikito tene na cuenta
ORANJESTAD (AAN): Luna di September a drenta, pa hopi hende esaki ta wordo considera como ‘High Season’ di Horcan! Esey ta loke David Barkmeyer, di Departamento Meteorologico Aruba a indica den un entrevista.
Registronan di hopi aña a mustra cu den luna di September, tin e ‘piek’ di mas hopi ciclon tropical fuerte ta pasa y ocasiona dañonan material grandi, incluyendo perdida di bida humano.
Awe mes cu ta Diaranson 4 di September 2024, meteorologonan ta observando di cerca tres Disturbio tanto riba Oceano Atlantico y tambe Caribe cu tin potencial pa bira un maltempo.
Barkmeyer a menciona e Disturbio cu a caba di pasa bay west di Aruba, y a mustra cu ora e yega cerca di Centro America e lo por desaroya den un ciclon. El a agrega cu mayoria di disturbio cu e ta lastrando y bay pabao cune, ta pasando hopi mas panort di Aruba. E ta laga e area aki banda di Aruba tiki humedo cu por produci cualkier awacero local, cu hasta tin chens di bin acompaña cu lamper y strena.
Lama Bruto costa panort: Semper lama panort di Aruba ta mas bruto cu ola mas grandi, of ta algo di awor. E experto Barkmeyer di DMA, a splica cu esaki semper tabata e caso, mirando e hecho cu ta for di e direccion ey biento ta supla, y ta pusha olanan pa bira mas bruto. Y pesey mes e parti zuid di e isla, ta e zona mas protehi di olanan grandi aki.
Pesey mes semper ora cu Meteo ta duna pronostico, cu na momento cu ta spera actividad di yobida acompaña pa lamper cu strena, automaticamente ta adverti esnan den boto chikito pa tene cuenta cu lama banda panort di Aruba ta mas bruto. Ta di spera cu esnan cu ta den boto chikito, no bay “aventura” den sectornan unda tin yobida fuerte andando, acompaña cu lamper y strena. Lama e parti local ey ta bira substancialmente mucho mas bruto inesperadamente.
Lama panort di Aruba tin biaha ta entre 3 cu 4 pia halto, kizas algun caminda por yega na 5 pia. Sinembargo Barkmeyer ta adverti cu ora yobidanan fuerte cuminsa cay, den un instante ta produci lama cu olanan di 7 te hasta 8 pia halto, aunke e ta temporal y pasahero. Sumamente peligroso pa botonan chikito.
