WEB ta bay tin servicio pa yena boter di awa durante Parada na Playa

ORANJESTAD (AAN): E aña aki, e compania WEB Aruba NV a lanza nan campaña di Carnaval cu a wordo yama “Awa! Bo Motor pa Carnaval”. 

E ta enfoca riba e importancia di keda mantene bo curpa hidrata durante Paradanan ora cu bo ta den solo fuerte.

   Pa bo keda hidrata den solo ta esencial pa regula temperatura di e curpa humano, cu ta haci esaki via di sudor, pa preveni malesanan peligroso relaciona cu calor, y mantene bo curpa ta bon fisicamente y tambe positivo den forma cognitivo.

   Bebiendo awa, bo ta duna bo curpa bek liquido cu a wordo perdi debi na calor, y ta evita cansancio, marea, y hasta kramp di musculo, y ta sostene salud di cuero.  Bebe awa regularmente, hasta si acaso bo no tin sed, specialmente durante temperaturanan halto cu solo fuerte.

   Special pa esaki, WEB Aruba NV lo bay instala den Vondellaan na Playa, un fuente special di awa, unda personanan por yega cu nan boter bashi y yena esaki bek cu awa.  Anto esaki ta gratis.

   WEB a indica cu esaki lo socede na Kavel Vondellaan 6, y ta riba Diadomingo 1 di Februari pa Parada di Mucha.  Tambe Diasabra 7 di Februari pa Lighting Parade.  Tambe Diadomingo 15 di Februari pa Parada Grandi di Playa.