The content originally appeared on:
Diario
ORANJESTAD (AAN): Diahuebs mainta Centro Operacional Maritimo di Wardacosta di Caribe Hulandes a ricibi un mensahe for di un Yate nabegando den awanan Caribense den necesidad di awa y gasolin.
Inmediatamente a tuma contacto cu e barco di Marina Real Hulandes, Zr.Ms. Groningen pa duna asistencia.
Tripulacion di Zr.Ms. Groningen den colaboracion cu miembro nan di Wardacosta, inmediatamente a tuma contacto cu e base di marina na Savaneta na Aruba pa por suministra un cantidad di awa y gasolin na e Yate den necesidad. Despues di a obtene e contenido necesario, a sali inmediatamente den direccion di e Yate, nabegando bao bandera Mericano.
Den ora nan tras di merdia, tripulacion di Marina Real y Wardacosta a yega na e Yate den necesidad y di un manera profesional a entrega e awa y gasolin na e dos tripulantenan riba e boto.
Agradecido y alivia, e dos tripulante nan a sigui e ruta di Zr.Ms. Groningen den direccion di Aruba. Miembro nan di Inmigracion y Aduana a controla e boto na momento cu el a yega Aruba.
E barco di Marina Real, Zr.Ms. Groningen ta den region di Caribe for di april y ta traha den colaboracion cu Wardacosta Americano y Wardacosta di Caribe Hulandes. Aparte di e operacion nan contra di traficacion di droga, Zr.Ms. Groningen tambe ta controla botonan di piscado relaciona cu documentacion di boto y tambe ta asisti cu misionnan di rescate.
