Venezolanonan feliz a subi caya pa celebra

Atake riba Venezuela

CARACAS: Pueblo di Venezuela a cuminza sinti Diasabra mes un aire di alivio ta drentando den tur skina.  Nan ta nota cu militarnan ta nervioso y spanta.  Pueblo riba su mes a cuminza ta celebra.

   Tin informacion no-confirma cu algun di nan a hasta subi borchinan cu poster di Nicolas Maduro, pa asina destrui esaki.  Tambe tin indicacion inoficial cu a destrui algun simbolo di tempo di fayecido Hugo Chavez.

   Pero hecho ta cu Diasabra atardi, tabatin basta hende riba caya, aunke transporte publico tabata practicamente paraliza na e pais.

   Riba Diadomingo cu tabatin mas transporte publico, por a nota cu mas hende na forma masivo a subi caya pa celebra.  E ta un mensahe fuerte pa Chavistanan nota cu pueblo ya no kier nan mas.  Nan kier pa e resto di e clan, incluyendo Diosdado Cabello tambe wordo deteni.  Nan ta pidi pa detencion tambe di fiscal general Tarek William Saab, y Ministro di Defensa, Padrino Lopez.

   Di e forma aki, ciudadanonan ta sinti cu porfin nan lo por tin libertad atrobe.  Libertad di expresion y sin miedo cu nan lo por wordo gara, deteni, of asesina pa comete e acto di protesta y celebracion asina riba caya.

   Den diferente area di Venezuela por a tende hendenan gritando di alegria, y cu nan ta spera cu di berdad tur gobernante Chavista ripara cu pueblo kier e cambio, y mihor nan mes empaketa maleta y desaparece di e pais.