Varios miembro di Warda Costa envolvi den traficacionnan di lote grandi di droga

Escandalo den Warda Costa di Aruba trata den Corte

Nan ta meti den traficacion di hende tambe
Un di esnan envolvi a mata su curpa  

ORANJESTAD (AAN): Un escandalo grandi den Warda Costa di Aruba, ta hayando atencion den sala di Corte di Husticia. E caso ta asina serio cu un di e miembronan di Warda Costa (kende ta un di e sospechosonan) lo a mata su mes door di e presion grandi pa e cantidad di placa cu e debe relaciona cu droga.

   E investigacion aki a hiba e nomber ‘Caso Watapana’ y investigacion ta mustra riba 6 sospechoso: B., Q., H., R., J. y e defunto Wernet. E grupo aki ta worde sospecha cu desde 2020, nan ta envolvi den importacion di droga y traficacion di hendenan ilegal.

   Importacion di 100 kilo di cocaina: For di e investigacion a sali na cla cu na luna di Januari 2023 lo a importa 100 kilo di cocaina, caminda a haci uso di un piscado local cu a bay tuma e droga riba laman for di un otro boto y trece tera.

   Tambe ta papia cu na Maart 2023 lo a sosode un otro situacion. Aki e grupo di Warda Costa ta worde sospecha di a suministra informacionnan vital y sensitivo na esnan cu mester trece ‘droga y hendenan ilegal’ pa asina nan no por worde intercepta door di Warda Costa.

   Miembro di Warda Costa a mata curpa: For di investigacion ta mustra cu defunto Wernet, dia 15 Januari 2023 a acerca un piscado pa trece 100 kilo di cocaina. Ta papia cu e lote lo a sali 80 mil Dollar y cu Wernet a paga 28 mil Florin pero a keda debe 112 mil Florin.

   Tin declaracion di testigo cu ta bisa cu e ta kere cu Wernet a mata su mes door di e presion cu tin riba dje pa paga e 112 mil Florin. Tambe tin combersacionnan cu a scucha entre Boekhoudt, Heyliger, Wernet, e sospechosonan R. y J., y un piscador.

   Diez aña di prison exigi: Ya caba a trata caso penal contra dos acusado esta Heyliger y Boekhoudt. Cada caso a worde trata separa. E otro sospechosonan R., J. y Q. ta pendiente pa nan caso bin dilanti.

   Heyliger ya a worde condena na castigo di prison pisa y ta sintando castigo den KIA.

   Recientemente, Corte di Husticia a trata e caso contra Boekhoudt, kende ta worde acusa: (*) Di a yuda importa droga. (*) Saca secreto di Warda Costa. (*) Mal uso di su funcion. (*) Di a worde cumpra. (*) Forma parti di un organizacion criminal.

   Ta asina cu Fiscal a exigi 10 aña di prison pa Boekhoudt y dia 25 November 2024, Hues lo dicta sentencia.

    Cinco aña di prison exigi pa piscado: Corte di Husticia recien a trata e caso penal cu Ministerio Publico a cuminsa contra e piscador A. Laveist. E caso aki tambe a worde trata separa. Ta sospecha Laveist di ta esun cu a trece lote di droga entre 1 Januari 2023 te cu 13 Februari 2023. Fiscal a exigi 5 aña di prison p’e.

   Den e caso di Laveist, Fiscal a mustra cu dia 17 Maart 2023 lo tabatin un control riba un boto cu a bin for di Venezuela den awanan teritorial di Aruba. Ta mustra cu tabatin combersacion telefonico y mensahenan entre Laveist, Boekhoudt, Heyliger y un otro persona, cu a keda desconoci. Dia 25 di November lo tin sentencia den e caso Laveist tambe.