Cu palabranan di condolencia na e Pueblo di Republica Dominicana
- Frecuencia di desaster na eventonan popular a exigi investigacion
- Mundialmente mester proteha e ser humano peligro grandi scondi
ORANJESTAD (AAN) Uno di e noticianan mas dramatico cu Aruba a ricibi e ultimo dianan, tabata e informacionnan cu a splica con na Republica Dominicana, un centro di alegria a bira centro di tragedia.
Sigur pa Aruba cu ta depende di turismo y asina ta amplia su atraccionnan pa publico, e pregunta mester surgi si no ta momento pa na nivel regional y mundial cuminsa atende cu un drama, cu awor a yega cerca di cas Aruba pero ta continuamente den publidad.
Na Republica Dominicana tabata trata di un espacio den cual publico tabata diverti su mes un rato.
Ora mira atras den historia di humanidad, por mira con publico continuamente tabata busca forma pa bandona problemanan di tur dia y busca recreacion y distraccion di bida diario.
Den tur historia di tur pais, for di e prome dianan por topa cu expresionnan di canto y baile di hende mescos cu encuentronan deportivo y pa relaha.
Na Republica Dominicana, hende a bini hunto pa goza di un ambiente festivo sin realiza cu morto tabata sconde pa atrae atencion mundial den sucesonan cu poco bez ta haya e atencion cu nan merece despues cu e informacionnan a sirbi pa informacionnan doloroso y de bez en cuando demasiado sensacional.
Ora papia di un drama, ta papia di dolor di hende, cu por tabata cualkier hende na un momento cu tanto hende ta uza pa duna alegria na bida.
E pregunta cu ta bini awor ta, comn cada tragedia di e indole aki ta contribui pa hende presta mas atencion na situacionnan cu por contene peligro scondi.
Den e caso aki tabata un centro nocturno. No mester bay mucho leu den historia pa topa cu dramanan na stadionnan, na lugarnan di encuentro cera of na aire libre, cu condicionnan cu ta peligroso.
Pa awe duna balor real na loke a pasa na Republica Dominicana y continuamente ta pasa na mundo den edificionan y na aire libre, mester cuminsa revisa leynan cu a dicidi riba reglanan di seguridad.
Con severo ley ta atende cu tur tipo di lugar cu ta acomoda hende y cu diariamente ta bira mas peligroso pa motibo di diseñonan nobo?
Antes un cas tabata wordo construi cu como peligro mas grandi, loke naturaleza tabata provoca semper y cuando tabata trata di edificionan pa hende cu suficiente entrada, capaz pa a traha nan mes cas of otro edificio.
Ora papia di centronan nocturno ta papia di centronan, caminda tin peligro di candela. Tin peligro cu un hende ta cuminsa comporta na un forma cu e ta amenaza otro personanan den publico.
Cuanto control tin riba construccion y material pa construccion den edificionan cu hopi bez no tin bentana of diferente saluda?
Combersacionnan cu Pueblo riba tereno por ehemplo di vivienda y lugarnan publico, ta ya indica cu tin peligro y sin control hasta lugarnan a wordo adapta y ta wordo uza pa loke nan no a wordo construi originalmente.
Awe na Republica Dominicana, dolor humano cu ta uno di e asuntonan mas importante pa periodismo, ta exigi tur hende presta atencion na e seguridad cu tur tipo di acomodacion pa e ser humano, ta brinda na tur momento.
Tin reglanan legal pa construccion pero tambe pa tur loke por pone den lugarnan caminda tin hende presente, cu pa ley tin un bida cu tur instancia mester sostene y proteha.
Mescos mester atende cu terenonan publico, cu mester conoce orden sigur den un temporada nobo cu mundo ta kere cu “nada por pasa”.
Mentalidad humano a cambia y hende ta sinti su mes mas poderoso pero ta evita di presta atencion na loke e sentimento falso por ocasiona.
Na e momento cu nos a tuma nota di e tragedia na Republica Dominicana nos a biaha un rato den realidadnan moderno, manera periodismo ta exigi y nos a mira peligro pa babynan na lugarnan sin regla pero tambe anciano cu no por scapa nan bida. Nos a mira e realidad di un mundo di hende cu ta kere cu el a vence tur peligro y asina ta crea mas peligro pa mundo.
Awe e dolor di tur cu pa un rato a conoce horor na Republica Dominicana na un forma directo of indirecto, mester pone nos realiza cu nos sabiduria cu nos ta amplia cada rato cu mas conocemento, mester resulta den pasonan cu ta baha e dolor di hende, cu no por preveni tragedia natural pero si por preveni loke man y mente di hende ta produci na demasiado ocasion mundialmente!
