Turistanan ta bay destinacionnan cu ta alinea cu prinsipionan global di resiliencia

Awe ta observa Dia Global di Resiliencia den Turismo:

ORANJESTAD (AAN): Awe 17 di Februari, rond mundo ta conmemora Dia Global di Resiliencia den Turismo, un dia proclama pa Nacionnan Uni cu tin como meta pa resalta e importancia di construi un industria turistico fuerte, flexibel y sostenibel. Aunke e dia aki no ta un dia liber na Aruba, su significado ta hopi relevante pa nos isla, considerando cu turismo ta e pilar prinsipal di nos economia.

  Pa Aruba, resiliencia no ta solamente un palabra elegante pero un nesesidad strategico. Den añanan anterior, nos a enfrenta diferente reto mundial, for di crisis economico te pandemia global. Cada situacion a revela di berdad con cada pais ta para, Destinacionnan cu ta prepara, adapta y innova, ta esnan cu ta logra sigui dilanti. Dia Global di Resiliencia den Turismo ta sirbi como un recordatorio cu turismo mester ta fuerte no solamente pa dianan di bon tempo, pero tambe pa momentonan di reto.

   Turistanan internacional awor ta mas consciente ora nan ta plania nan bishita. Bishitantenan for di Merca, Europa y Latinoamerica ta analisa diferente factor prome di haci reservacion. Siguridad, sistema di salud, maneho di crisis, sostenibilidad ambiental y planificacion pa emergencia ta bira parti di nan proceso di decision. Turistanan kier siguransa cu si algo inespera sosode, e destinacion lo por responde lihe y eficientemente.

   Den e contexto aki, e compromiso di Aruba pa cu resiliencia ta bira un bentaha competitivo. Nos colaboracion fuerte entre sector publico y sector priva, industria di hospitalidad bon regula y inversionnan continuo den turismo sostenibel ta aumenta confianza di bishitantenan. Pa hopi hende cu ta biaha, ta importante pa nan sa cu Aruba ta alinia su mes cu principionan global di resiliencia. Esaki ta manda un mensahe di profesionalismo y stabilidad.

   Resiliencia awor no ta limita solamente na responde na emergencia. E ta inclui proteccion ambiental, innovacion digital, entrenamento di personal y involucracion di comunidad. Turistanan moderno ta prefera destinacionnan cu ta proteha nan recurso natural y fortalece nan comunidad local.

   Aunke e dia aki no ta celebra cu evento grandi na nos isla, su mensahe ta hopi actual y importante. Ta un momento pa reflexion y accion. Den un mundo unda decisionnan di biahe ta basa cada bes mas riba stabilidad y sostenibilidad, resiliencia den turismo no ta solamente un opcion pa Aruba, sino un obligacion pa nos futuro.