Turista a bolter cu vehiculo SUV dilanti Olde Molen

ORANJESTAD (AAN): Diasabra marduga algo prome cu 4:00 am, un patruya di Polis a bay pura poco pariba di Olde Molen pa un accident serio, y cu un vehiculo a bolter.

   E prome unidad di Polis di Noord cu a yega, a bin topa meymey caminda un vehiculo Suzuki Jimny color preto scur cu number V-5939 cu a kenter.  E ocupantenan cualnan ta turista no tabata herida.

   Na e lugar a bin compronde cu nan tabata bini cu velocidad halto di pariba y no conoce e caminda. Debi na e esaki nan a hala hopi na man robes.

   Esaki a causa cu nan a dal un Toyota Vitz staciona banda di caminda, asina duro te cu a pushe y mand’e den e mondi lagando un pida so visibel.  Debi na e impacto, e Suzuki Jimny a bolter.

   Takelwagen mester a presenta pa lanta e vehiculo.  Doño di e Vitz lo a haya un mal sorpresa ora cu el a yega bek na su auto cu a sufri daño.