Turismo a cera aña cu un recuperacion di 72%

ORANJESTAD (AAN):  Oficina di Turismo ta indica cu aña 2021 a pone e “tono” pa y a marca e cuminsamento di un etapa continuo di recuperacion di e pilar mas importante di Aruba su economia.

Den su totalidad, e cifranan di e periodo di januari 1, 2021 – december 31, 2021, ta mustra cu Aruba a conoce un recuperacion cu a cuminsa cu apenas 33% na januari, pero a acelera ya na april y a yega riba di 80% na mei.

For di luna di mei te cu ceramento di aña, apesar di tur situacion cu a presenta, e porcentage di recuperacion no a baha di 80% mensual.

Teniendo na cuenta cu tabatin varios reto serio den 2021, asina mes a logra mantene e recuperacion y cera aña cu un grado di recuperacion di 72%, compara cu e cifranan di 2019. 

No tabata facil y a tuma hopi esfuerso di parti di Aruba Tourism Authority y henter e industria di turismo, localmente e internacionalmente, pa mitiga e efectonan di e desaroyonan menos positivo pa surpasa e retonan cu a presenta na 2021.

A cuminsa aña 2021 cu un proyeccion un tiki reserva ainda, pero Aruba su reputacion y promocion fuerte, y imagen como un isla sigur y cu bon protocol pa cuida tanto e residente como e bishitante, a logra mitiga e efectonan di cancelacionnan di reservacionnan y a adapta na nan.

Algun di e retonan tabata: e subida di cifranan di contagio cu entrada di e variante Delta y despues e variante extra-contagioso Omicron, cancelacionnan ora cu Estadonan Uni di Merca a declara Aruba como un pais “Level 4”, y e diferente cambionan grandi den protocolnan di re-admision di parti di varios pais pa ora e turistanan bolbe nan pais di origen.

“Un grado di recuperacion di 72% ta un resultado fabuloso pa nos destinacion, considerando e impacto di e pandemia riba biahamento mundialmente y teniendo na cuenta e retonan multiple cu a presenta en general,” Ronella Croes, CEO di A.T.A. a expresa.

“Cada mercado tin su retonan actualmente, uno mas impactante cu e otro; y ta depende con diferente factor ta alinea pa logra atrae turistanan pa nos isla. Aruba a logra yega na un pakete di protocol, condicionnan y, hasta un App y un seguro special cu mester a crea for di “scratch” den un tempo relativamente cortico. Awe nos ta wak e resultadonan positivo y optimista di e iniciativanan tuma, di e forma progresivo y proactivo di pensa y actua, trahando cu teamnan multi-disciplinario.”

Na December 2021 a perde 12% di grado di recuperacion proyecta pa e luna versus 2019, y na luna di Januari ta proyecta cu lo por perde 25% di cantidad di bishitante compara cu locual a proyecta pa e luna. Esaki tur debi na Omicron. Ta confia cu lo re-inisia e trayecto di recuperacion despues di e ola actual, aunke cu grupo nan di biahe incentivo cu a cancela, a postpone pa 2023 bai dilanti y pues lo ta dificil pa recupera e parti di negoshi aki.