Tur pashent tin derecho segun ley pa entrega keho contra centronan di cuido

Segun Carolina Thiel Span:

ORANJESTAD (AAN): Den un entrevista recien cu Señora Carolina Thiel-Span di Inspeccion di Salud Aruba (IVA), el a enfatisa cu tur cliente tin e derecho di entrega keho cerca IVA ora cu situacionnan presenta na unda cu ya no tin confiansa mas.

   Señora Thiel-Span a duna di conoce cu IVA ta ripara cu ainda tin hende cu tin miedo of no sa cu nan por entrega keho of melding. Tur persona por haya informacion con pa haci keho of si nan situacion ta cay bou di keho of no. Por haci na diferente forma, entre otro via yamada, por bay personalmente y tambe via Whatsapp.

   Segun el a remarca, IVA tin un procedura pa maneha e kehonan cu nan ta ricibi. Na prome luga, nan ta bay analisa e contenido di e keho. Ta haci un evaluacion, y despues ta sigui e paso, dependiendo di e evaluacion, ta dicidi si e ta wordo categorisa como keho of como un un posibel calamidad. Cada un di esakinan, ta sigui den e trayectoria di investigacion pa determina unda no a bay conforme, kico a pasa y kico mester mehora pa evita cu e situacion ripiti.

   “Si tin hende cu tin miedo pa represaya si nan haci keho, nos kier recorda nan cu esaki ta nan derecho cu ley ta duna na pashentnan y nan familiarnan den caso cu e pashent fayece of no por papia pa su mes of ta mayor di edad. Esaki ta un linea habri y nos ta desea pa tur hende sa cu esaki ta un derecho cu nan tin pasobra nos tur tin derecho di un calidad di cuido cu ta sigur cu tin e pashent na prome luga”, señora Thiel-Span a duna di conoce.