Tuma contacto cu DIMP pa busca informacion y evita problema di impuesto

Directora di Dimp, señora Luenne Gomez-Pieters:

ORANJESTAD (AAN): Directora di Dimp, señora Luenne Gomez-Pieters, den entrevista cu DIARIO a enfatisa cu ta importante pa contribuyentenan cu no tin suficiente informacion, yega Departamento di Impuesto pa wak kico ta valido y ta conta pa nan. Esaki pa evita, como un eenmanszaak cu ta responsabel pa debenan di impuesto, cu ta bira mucho laat y beslag por wordo poni riba nan pertenencianan, entre otro, cas, auto, aparatonan electronico.. tur cos den cas y riba tereno, hasta si e ta pertenece na e bisiña. Segun tempo ta pasa, e ta empeora.

   Tambe ta importante pa negoshinan chikito, porehempel, Kioskonan, pa nan sa kico ta conta pa nan y kico no. Y pa tene cuenta cu segun e Kleineondernemersregeling (KOR), no mester paga BBO ni entrega formulario si nan entrada ta bou di 50 mil Florin pa aña.

   Señora Gomez-Pieters a enfatisa cu Dimp su deseo ta pa tur contribuyente sa cu e no mester warda pa cos bira urgente pa tuma contacto cu e departamento. Apesar di retonan cu e departamento tin pa ricibi yamada via telefoon, pa motibo cu ta trahando cu 7 hende pa atende cu telefoon.

    Tambe Dimp ta capacitando empleadonan publico, dunando diferente curso pa mehora servicio na clientenan riba un nivel mas halto y riba varios dialuna merdia e departamento ta cera pa tentamen. Pa esaki, señora Gomez-Pieters ta pidi pueblo un tiki pasenshi ora di yama e departamento y cu e tardansa cu esakinan por ocasiona pero ta enfatisa pa no keda sin tuma contacto cu Departamento di Impuesto pa haya tur informacion necesario pa evita cu problemanan di impuesto escala.