Traspaso historico di Gabinete Wever-Croes 2 pa Gabinete nobo

ORANJESTAD (AAN):  Por considera e encuentro cu diabierna mainta cu a tuma lugar na Bestuurskantoor como un encuentro historico.

Pa prome biaha den historia di nos pais, e ministernan di Gabinete Wever-Croes a haci un traspaso asina extenso na e gabinete nobo.

            Minister President saliente Evelyn Wever-Croes tin algun siman ta elabora riba preparacionnan pa e traspaso di gobernacion. Minister President saliente a invita e miembronan nobo di gabinete pa un encuentro historico den sala di Conseho di Minister caminda el’a felicita nan y a gradici nan pa acepta e invitacion. Minister President saliente Wever-Croes a splica con a maneha gobernacion e ultimo simannan y despues cada minister a sigui cu su counterpart.

            Contrario na 7 aña y mey pasa, ora e gabinete di Mike Eman a sali di gobierno, no tabata tin ningun ningun traspaso. Minister President saliente Evelyn Wever-Croes y Minister President sr. Mike Eman a reuni practicamente un ora y despues a duna declaracion hunto. Sr. Eman a gradici sra. Wever-Croes pa e forma con a organisa e traspaso y pa e gobernacion di e ultimo 7 añanan.

            Di su banda sra. Wever-Croes a enfatisa cu gobernacion ta continuacion, y pesey p’e un bon transicion ta asina importante. E ta hopi orguyoso cu tanto e como su coleganan minister di Gabinete Wever-Croes 2 por a prepara un traspaso asina extenso y debido. El a desea sr. Eman hopi exito y sabiduria, y a pidi sr. Eman pa prepara tur cos asina nechi dia cu e bin bek den gobierno.

            E ambiente tabata uno ameno, y por bisa cu e traspaso di Gabinete Wever-Croes 2 pa e Gabinete nobo tabata uno historico y sigur exitoso.