Trahadornan sexual na Aruba no sa cu tin un “legal paradox” cu ta encera nan trabao

Trahado Social Damirys de la Rosa:

*Esaki ta complica mas nan situacion 

ORANJESTAD (AAN) – E Trahado Social Damirys de La Rosa, den entrevista cu DIARIO tocante e conferencia “Sexual Worker's Health & Safety na Aruba” a sigui comenta tocante e falta di congruencia cu tin, pa loke ta regarda e leynan pa cu trabao sexual na Aruba.

            Na mesun momento cu ley ta bisa cu no mag tin trahado sexual na Aruba, y cu si tin trahado sexual nan mes mester registra na DBZ, banda di esey ora di wak e landsverordening, esaki ta bisa cu pa traha den un bar na San Nicolas e mucha muher mester bin cu un permiso.

            “E permiso aki, eigenlijk, mester tin e nomber di un ‘hostess’. Asina e muchanan muhe aki ta haya nan permiso. Sinembargo, kico nan ta bin haci? Ta trabao sexual. Dus, anto nada ta clop di loke e leynan ta bisa”, De la Rosa a reitera.

            “Y ora cu bo tin diferente ley cu ta contradeci otro, e ta crea un confusion, no solamente pa e trahado sexual pasobra bo no sa kico tur, eigenlijk, bo ta bin pa haci, of kico tur ta e leynan cu ta cover bo, pero tambe otro organisacionnan cu ta traha hunto cu nan, por ehemplo DIMAS, KPA, SANIBAR y DVG, no tin blanco riba preto kico cada un nan rol ta pa e doelgroep aki. Anto, con nos ta suppose di brinda nan e ‘health & safety’ nos mes como organisacionnan no sa kico nos ta suppose di ta haciendo pa cada un di nan”, de La Rosa a enfatiza.

            Ademas di esey, Damirys a bisa cu e trahadornan sexual, aki na Aruba, no ta na haltura cu tin un “legal paradox” (contradiccion legal) pues, tin un problema 'going on' cu nan mes no sa cu nan ta parti di dje of cu e ta encera nan trabao.

            “Esaki ta hacie mas complica pasobra cualkier trato cu nan ta hayando den nan trabao, nan lo kere cu esaki ta normal, of cu ta gewoon ‘part of the job’. No tin nada cu nos por haci pa nan den nan cabes”,  Damirys de la Rosa a señala.