Trahado Guia di Pasadia Briyo di Solo ta elabora riba proceso di fabricacion di te di torohil produci pa nan clientenan

ORANJESTAD (AAN)--  Marelee Feliciana, Trahador di guia na Pasadia Briyo di Solo, den entrevista cu Matutino DIARIO, a elabora tocante e proceso di fabricacion di te, cu e clientenan ta produciendo, aki na Aruba.

E proceso ta cuminza di e siguiente manera. E clientenan ta piki e te, nan ta lab’e, sec’e bon, nan ta kibra e blachinan, despues ta hinca nan den sakito, y pone nan den sakito, y asina nan ta haci e benta di te.

“Asina aki, e proyecto ta, y nos a bin cu e idea, di con no busca un lugar unda nos por bende esaki tambe, mirando cu, toch, e benta di te ta bayendo hopi bon.

Dus, e ora ey ta un stimulacion pa nos clientenan; nan ta hopi contento di wak con nan mes ta desaroya tambe cu un producto”, señora Feliciana a relata.

Marelee a conta con e idea a bin di un di su coleganan. Actualmente tin un sabor so di te, cu ta di torohil, y mirando tambe e capacidad di e clientenan, nan a observa kico e cliente por, y nan a reta nan un tiki, pa wak kico nan por, y asina e proyecto a cuminza, señora Feliciana a duna di conoce.

“Den futuro nos kier expande e sabornan, pero semper nos tin nos programa, cu nos tin cu mantene na dje, y Pasadia Briyo di Solo. Pero si, e deseo ta pa den futuro nos tin mas sabor di te y asina tambe, cu e bondad di Aruba, por bin, cumpra y saborea nos te di torohil y den futuro, otro sabornan”, Marelee a expresa.