The content originally appeared on:
Diario
Alonso Tromp, Lider di TOPA:
ORANJESTAD (AAN) – Presidente di Sindicato TOPA, Alonso Tromp, den entrevista cu DIARIO a comenta, cu enberdad desde cu Aruba ta existi como pais, tin cierto cosnan cu no a bay bon.
“Danki Dios cu e gobierno ta birando mas conciente, y naturalmente e Landspakket no a bin por nada. Esey a pone cu nos ta stuur e barco den otro rumbo”, Tromp a indica.
El a enfatiza cu e no ta bay cuestiona e politiconan, pasobra e no ta un politico. “Loke si nos ta, ta miembronan sindical, y nos kier ta un miho Aruba. Con nos ta haya un miho Aruba? Ta ora bo tin bon hendenan prepara, hendenan abierto, positivo naturalmente, cu kier nan positivo pa e pais, y den esey nos ta enfocando. Nos no ta bay mete cu politico, nos ta para fuerte si pa nos miembronan, y naturalmente nos ta para fuerte pa un miho Aruba”, Tromp a reitera.
Presidente di TOPA a subraya cu si nos wak bon, un politico ta wordo evalua cada cuater aña, y si e no ta bon e ta wordo sanciona. Dus, cu e ta bay cas! Tromp a remarca.
“Pero si e ta bon e ta haya continuidad, den pueblo su pensamento. Corda bon, nos tin cu respeta democracia. Anto e curso aki ta un bon momento pa tur hende haye. Y tur hende cu kier por bin”, Alonso Tromp a señala.
El a indica cu ciudadanonan di e pais aki cu kier haya hechonan real, pasobra hopi biaha bo ta haya deformacion di informacion, y señor Dijkhoff a haci un onderzoek, riba hechonan real. Esey a touch TOPA, y nan a bisa pa ban participa den e curso aki y nan ta manda miembronan pa hacie.
El a reitera cu e no ta bay sigui e curso pasobra e no ta politico, pero e meta di TOPA ta pa pone bon liderazgo pa TOPA por sigui pa den futuro tur hende wak cu e sindicato tin un directiva serio, cu ta un sindicato serio, cu ta para pa principionan.
