Tin un tendencia cu propiedad ta wordo traspasa na notario na prijsnan mucho mas halto

Directora di DIMP Luenne Gomez-Pieters:

* Discusionnan ta andando con pa salvaguardia nos mes hendenan 

ORANJESTAD (AAN) – 'Overdrachtbelasting' ta un impuesto cu ta wordo cobra na momento cu tin un  traspaso di propiedad. Asina Directora di Departamento di Impuesto, señora Luenne Gomez-Pieters, a menciona den entrevista cu DIARIO.

            “Nos ta wak cu tin un trend, cu tin hopi propiedad cu ta wordo pasa na notario pa prijsnan mucho mas halto, cu tin cierto discusionnan cu tin andando, pa con bo ta bay salvaguardia bo mesun hendenan local pa tin vivienda den futuro, y cu esakinan no wordo cumpra pa esnan cu ta biba pafo di Aruba, cu lo kier haci negoshi cu nan. Esaki ta un discusion apart”,  Luenne Gomez-Pieters a señala.

            El a agrega cu BBO y BAZV tambe ta canando segun e verwachting eynan, e 'touristenheffing' igualmente, como tambe e primanan di AZV, SVb.

            “Si nos ta wak por ehemplo AZV, e primanan cu nos a colecta durante 2024 te cu November, ta 341 miyon. Esaki ta 25.7 miyon mas cu e aña anterior, y bo ta wak cu e primanan social di SVb y AZV, ta cana hunto cu loonbelasting. Kiermen, loonbelasting no por subi anto e primanan aki ta keda atras, pasobra un formulario ta caminda cu doño di trabao ta haci esaki”, directora di DIMP a bisa.

            El a subraya cu DIMP ta satisfecho cu e trabao aki; naturalmente no ta un traba facil, no ta un trabao cu ta wordo aprecia door di tur hende den e comunidad. Pasobra nos ta cobra impuesto, pero e ta un trabao hopi importante si, pa garantiza pagonan cu mester sosode di parte di gobierno pa cu interes y fiansanan cu tin andando, pa cu inversionnan cu mester cuminza e aña aki, of cu tabata tin planea pa aña pasa, pasobra esey ta e entrada cu gobierno tin pa por, eigenlijk, lora un gobernacion”, Luenne Gomez-Pieters a señala.