Tin un par di asunto cu gobierno lo mester atende pa e clase trahado

Segun Hubert Dirks di FTA:

ORANJESTAD (AAN) Señor Hubert Dirks, di e Federacion di Trahadornan di Aruba “FTA”, a declara den entrevista cu DIARIO, cu FTA ta desea cu enberdad e pueblo expresa su mes bon, y cu Aruba por haya bon representantenan di pueblo y un bon gobierno cu por tene cuenta cu, entre otro, loke e sindicatonan ta trece padilanti.

   Dirks a splica cu sin duda, den e sector laboral tin retonan y FTA ta tratando di yega na un structura, na un dialogo structura, cu nan ta haya a tarda demasiado, y cu pa e siguiente gobierno, esey mester tuma lugar.

El a indica cu e linea cora cu pais Aruba tin, ta e situacion financiero y na final si no tin fondonan pa gobierno haci cualkier trabao, sigur manera cubri su debenan y paga salario, etc., e ta bira un problema.

“Pero pa e trahado mes como persona y como ser trahado, nos ta kere cu tin un par di asunto cu mester wordo atendi, cu ta su situacion personal, su poder di compra, inflacion, e trato cu mester recibi y tambe cu mester tene cuenta cu nos ta bibando den un crecemento economico, nos por bisa, exagera, acelera, cu no ta dunando e parti positivo so, pero e tin su consecuencianan negativo, un presion grandi riba mercado laboral, cu mester bin trahado di afo” Hubert Dirks a acentua.

El a agrega cu mester importa trahado migrante pa nos mercado laboral, y esey lo por nifica un presion general: structura, vivienda, y den tur sentido. E hendenan cu lo bin mester tin un bon maneho, si tin criteria ken ta bin, di ki edad, ki impacto positivo lo tin riba fondonan di SVb/AZV y tambe pa loke ta e poder di compra, pa loke ta hoteleria, e sindicalista ta haya cu na momento cu tanten turismo ta bayendo bon, cu tin fondo, cu tin placa ta drenta por haci cu e trahadornan por tin mas comision mas tips, y di parti di sindicatonan nan por exigi mas den e acuerdonan laboral (CAO), cu ultimo añanan a faborece e trahado.