Tin un dialogo aworaki  kico Aruba kier como maneho di tecnologianan na scol

Minister Gerlien Croes:

ORANJESTAD (AAN) Minister di Enseñanza, Innovacion y Deporte, Gerlien Croes, a menciona den entrevista cu DIARIO, cu tin dialogo na e momentonan aki, tocante kico Aruba kier como maneho di tecnologianan na scol.

   “A ser proba den diferente rapportnan e ultimo añanan aki, cu devises den nos scolnan, den cierto añanan bo tin cu keda construi, pakico? Por ehemplo, pasobra motoricamente,  un mucha den eerste cu tweede ta hopi importante p’e skirbi ainda na man. Locual cu nos a wak den e proyectonan cu a wordo carga den pasado, por ehemplo pa Frere Bonifacius, cu un tempo a bay full na tablet. Recientemente durante un bishita na un scol na Santa Cruz, nos a combersa cu e cabesante saliente di Frere Bonifacius,  y e intencion ta cu nos ta bay bin cu un proyecto piloto, no e aña venidero pero si esun siguiente, unda cu klasnan 4,5 y 6 lo por bay completamente riba devises, y e klasnan 1,2 y 3, ta keda, por lo pronto, cu nan por uza ‘devices’, pero no cu full e les ainda ta bay riba esaki”, e mandatario a señala.

   El a sigui splica cu digitalizacion ta hopi mas cu devises. “Na e momento aki tambe nos ta bay haci un inventario rond di Aruba, di tur e dish y boardnan cu tin, na cual scol falta, y recientemente nos a haya peticion di algun scol cu falta ainda, of cu mester wordo reemplaza. Pero nos ta bay haci un registracion nacional di kico tur tin, kico tur falta, pero tambe no solamente digitalizacion a base di devises, kico eigenlijk, nos kier digitalmente y locual cu nos kier haci den futuro cercano pa pais Aruba”, Minister Gerlien Croes a relata.

   E dignatario a splica cu considerando cu e ta carga e Ministerio di Innovacion tambe, continuamente e ta ocupa cu esaki, y e por a tuma nota cu e team cu a carga e proyecto aki na Curacao, cu tabata cerca dje na Aruba, nan tin aworaki na tapara un palabracion pa haci cu Curacao, na unda e mesun team aki lo yuda carga e proyecto aki den onderwijs Aruba tambe.