Tension mundial na inicio temporada halto di turismo!

Confrontacionnan  mundial ta confirma advertencia DIARIO pa fin 2024

*Conflictonan na Gaza y Ukraine ta rementa e aspiracion di paz

*Aruba y detencion di Prome Ministro Israel si e kier drenta Hulanda 

ORANJESTAD(AAN)—“Aruba como teritorio Hulandes mester wordo bon informa di e situacion mundial nobo sumamente peligroso cu ta presenta su mes na final di 2024.”

Esaki ta informacion cu DIARIO a ricibi ayera y ta parti di acumulacion di informenan di DIARIO riba e situacion internacional nobo pa diferente motibo.

Na un forma continuo lectornan a wordo pone na haltura di e realidad, cu e tension mundial por escala den situacionnan serio prome cu 2025 bati na porta.

Mientras Aruba na e momentonan aki ta den gara di eleccionnan pa Parlamento di Aruba y atencion ta dirigi riba programam di partidonan, e situacion mundial ta haci cu Aruba mester wordo pone na haltura kico e resultado directo di e actual problemanan mundial por tin pa e pais.

Informantenan clave di DIARIO ta di acuerdo cu Aruba sigur mester presta atencion na e sucesonan, cu sigur por tin impacto na prome lugar riba resultadonan di e sector di turismo di Aruba si e situacion mundial sigui escala.

“Mundo a drenta un situacion directo di guera den cual amenazanan serio ta wordo lanza y relacionnan diplomatico entre paisnan ta na discusion,”informantenan a indica.

A mustra cu aki no ta asunto di inspira miedo ni temor, pero si pa avisa poblacion di Aruba di e situacion serio cu ta presenta riba dos tereno cu por tin implicacion directo pa paz mundial, cu ya ta un motibo serio pa discusion si tene na cuenta cu ya ta papia di armanan pisa cu por wordo utiliza den confrontacionnan internacional.

Ayera mundo a conoce e culminacion na momento cu e guera na Ukraine a haya e tono cu tanto mundo tabata teme.

Segun Ukraine a trece dilanti, Rusia a utiliza un raket intercontinental, pues di distancia enorme contra Ukraine den e atake contra e ciudad Dnipro.

E prome contesta di Merca tabata cu e distancia cu e misilnan en cuestion por cubri tabata menos cu loke Ukraine tabata pretende.

Sinembargo, e argumento aki no a wordo acepta y Ukraine ta insisti riba e tipo di arma cu a wordo utiliza dor di Rusia cu a amenaza cu e ta cla pa ataca mas pais den su region y tin Europa na e momentonan aki den su gara.

Si na e parti di mundo aki, e tension ta total na e momentonan aki, e situacion na Medio Oriente tambe a rementa na momento cu e Corte Internacional na Den Haag a emiti orden di detencion contra Prome Ministro di Israel Netanyahu acusa basicamente di crimennan contra humanidad.

E resultado den e relacion enrre Reino y Israel ta, cu e Ministro di Defensa di Hulanda, cu ta e Ministro di Defensa di Reino a duna di conoce cu su biahe pa Israel no ta sigui.

Ta prome bez cu Corte Internacional ta condena un Hefe di Estado eligi na forma democratico pa crimen di guera y contra humanidad, pa cual tambe a acusa Putin.

Ayeranochi ainda mundo tabata en espera di decision final den caso di e Gobierno Americano riba e desaroyonan cu a surgi despues di e acusacion oficial contra e Prome Ministro di Israel.

E desaroyo aki no ta relaciona cu e acusacion di Africa del Sur cu Israel ta comete gonocida pues matanza di maximo gravedad den e Guera na Gaza.

Tur e 124 paisnan cu a firma e acuerdo di Roma, pues tambe e paisnan di Union Europeo entre cual Hulanda, tin e daber pa detene e Presidente di Israel na momento cu e pone pia riba nan teritorio, loke ta motibo di e cuestion, kico lo pasa si e Prome Ministro di Israel por ehempel, dicidi cu e ta biaha pa Aruba cu ta teritorio Hulandes, aunke Aruba no ta parti di Union Europeo.

Aki atrobe e relacion entre Aruba y Hulanda regla pa Statuut y e relacion di Hulanda den Union Europeo, ta bini dilanti. DIARIO ta den contacto estrecho cu informantenan cu ta indica cu e asunto aki mester haya atencion debido na Aruba.

Den proximo edicionnan DIARIO lo sigui informa riba e situacion unico cu ta rementa na momento cu Aruba ta completamente absorbe pa su eleccionnan pero tambe inicio di su temporada halto di turismo.

Sigur den e confrontacion abierto entre Rusia y mundo liber, mester tene cuenta cu e resultado cu por surgi y influencia sector di turismo.