Te ainda tur actividad Politico ta progresando bon den cooperacion cu Polis

Liliana Rasmijn mustrando cu lo tin Ley Seco tambe

ORANJESTAD (AAN): For di bista di Cuerpo Policial, te ainda e desaroyonan rond di Eleccion 2024 ta bayendo bon!  Esey ta loke vocero Liliana Rasmijn a comenta.  El a splica cu for di momento cu fecha di Eleccion na December a bira conoci, nan a core yama tur Partido Politico pa acudi na un reunion cu Polis.

   Cada partido politico a manda un representante cu a sinta cu e Comision di Polis.  Polis a lesa y duna nan tur regla y protocol cu nan ta spera di lo wordo sigui durante campaña y dia mes di eleccion.  Ademas Polis a sinta scucha e peticionnan di cada Partido Politico tambe.  Pero en general cu e reunion ey ta tur Partido Politico a haya sa loke nan por haci, y unda nan tin di acudi pa haci peticion pa actividadnan cu nan tin planea pa tene.

   Segun Rasmijn, e Comision ta dicidi riba cada peticion cu drenta, aunke toch mayoria di e peticionnan ta wordo honra, dependiendo di e horario y di e tipo di actividad.

   Via e cooperacion aki, por ehemplo Polis ta wordo informa di antemano cu ora un candidato ta core rond cu vehiculo cu speakernan grandi, cu nan sa e number di e vehiculo, y nomber di e chauffeur responsabel, y tambe den ki bario nan lo pasa.

   Cuerpo Policial ta indica cu nan ta pendiente pa un Decreto Ministerial sali pa dicidi riba Ley Seco cu lo bay start riba Diahuebs 5 di December 2024 pa 6:00 pm, y lo keda vigente te Diasabra 7 December 2024 pa 6:00 am.

   Corda cu pa Ley Seco, e Departamentonan di Control lo ta pasando ta controla diferente Supermarket, Bar, Rumshop, y Tienda pa check si ta cumpliendo cu e decreto.  Mayoria lo mester tin tur alcohol cera tras di porta.  Pues ni alcohol cayente of frieu no por wordo bendi.

   Parti Hotelero si por sigui bende alcohol cu turista, pero segun e ley, hendenan local no por wordo sirbi durante e vigencia di e Ley Seco.